Eis Portavóz CIGC atual Diretora Jerál Prestasaun Servisu Saúde, Odete da Silva Viegas. Imajen/Egas Cristovão

DILI, 22 juñu 2020 (TATOLI)Estadu Emerjénsia (EE) datoluk ne’ebé Prezidente Repúblika, Francisco Guterres ‘Lú Olo’ dekreta iha loron 27 maiu ba implementasaun durante loron-30, sei ramata iha loron 26 juñu tuku 23:59.

Portavóz Sala Situasaun, Sentru Integradu Jestaun Krize (CIGC, sigla portugés), Odete Viegas, hateten maski implementasaun EE kuaze konklui maibé públiku presiza kontinua kumpre regra ne’ebé fó sai husi Organizasaun Mundiál Saúde (OMS) inklui Ministériu Saúde (MS) atu prevene-an husi COVID-19.

“Iha semana ida-ne’e Estadu Emerjénsia sei ramata maibé servisu COVID-19 ne’e rasik sei nafatin iha to’o OMS globalmente deklara katak laiha ona,” dehan Portavóz CIGC liuhosi konfrénsia imprensa iha Sala Sentru Mídia COVID-19, iha Sentru Konvensaun Dili (CCD, sigla portugés), segunda ne’e.

Iha biban hanesan, servisu saúde sei hala’o nafatin vijilánsia iha territóriu laran tomak no haforsa liután iha vijilánsia iha área fronteira terrestre.

“Daudaun ne’e la’ós de’it Ministeriu Saúde maka halo esforsu maibé husi parte Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) inklui autoridade lokál halo esforsu atubele prevene ema tama ilegál. Ema ne’ebé tama ilegál, parte Polísia Unidade Patrullamentu Fronteira (UPF) sira kaptura no entrega kedan ba servisu saúde sira,” nia akresenta.

Atuál Diretora Jerál ba Prestasaun Servisu Ministériu Saúde, realsa iha EE datoluk iha fatin públiku, eskola, no universitáriu hahú hala’o ona atividade maibé nafatin kolabora ho MS atu nafatin implementa medida preventiva.

“Nune’e ita nafatin la’o tuir rekomendasaun sira ne’ebé maka OMS fó hodi prevene ita-nia an husi surtu COVID-19,” tenik Portavóz Sala Situasaun.

Nia subliña, maski implementasaun EE kuaze ramata maibé esforsu sei la to’o iha ne’e de’it tanba ema hahú desobediensia ba regra.

“Ita tenke tau iha prátika loron-loron katak moras ne’e sei eziste. Ita liu ona faze dahuluk no daruak maibé provavelmente bele hetan situasaun a’at liu ida-ne’e tanba ita-nia nasaun viziñu Indonézia loron ba loron aumenta kazu konfirmadu no ita bele kona impaktu kazu importadu. Tanba ne’e husu komunidade sira atu kolabora ho autoridade lokál no autoridade Polísia inklui Militár, bainhira hetan ema foun ne’ebé tama ilegál tenke informa nune’e ita bele prevene-an husi kazu importadu sira,” nia apela.

Totál kazu konfirmadu iha Timor-Leste hamutuk na’in-24 no provável na’in-haat, ne’ebé husi totál konfirmadu ne’e, na’in-22 rejista iha Dili enkuantu na’in-rua seluk rejista iha Munisípiu Liquiçá.

Iha loron 15 maiu, CIGC deklara pasiente konfirmadu COVID-19 no provável rekuperadu hotu ona no to’o agora seidauk rejista kazu foun maski ema kontinua tama ilegál husi fronteira terrestre.

Kazu konfirmadu ne’ebé rejistadu iha Timor-Leste hanesan kazu importadu husi sidadaun ne’ebé halo viajen husi nasaun afetadu COVID-19 no tama mai Timor-Leste liuhosi dalan fronteira terrestre no aeroportu.

To’o oras ne’e, kazu konfirmadu iha Timor Osidentál, Indonézia hamutuk 111, na’in-44 maka rekuperadu no na’in-ida maka mate.

Totál kazu konfirmadu iha Repúblika Indonézia hamutuk 46.485, na’in-18.735 maka rekuperadu no na’in-2.500 maka mate.

Iha nasaun tomak, daudaun ne’e rejista totál kazu konfirmadu 9.007.391, rekuperadu 4.860.137 no mate 471.246, nune’e kazu ativu hamutuk 3.746.7000.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here