Portavóz CIGC, Odete Viegas. Imajen Tatoli/Egas Cristovão

DILI, 22 juñu 2020 (TATOLI) – Maski to’o oras ne’e Timor-Leste la rejista kazu ativu, dezde Sentru Integradu Kestaun Krize (CIGC, sigla portugés) deklara iha loron 15 maiu katak pasiente konfirmadu no provável rekuperadu hotu ona, maibé to’o oras ne’e ekipa saúde nafatin halo vijilánsia sentinela.

Portavóz Sala Situasaun CIGC, Odete Viegas, kazu ativu ba COVID-19 kontinua zero no seidauk deteta kazu transmisaun iha komunidade.

“Atividade vijilánsia sentinela kontinua hala’o nafatin iha territóriu laran tomak, nune’e bele deteta transmisaun iha komunidade nia le’et,” tenik Portavóz CIGC liuhosi konferénsia imprensa iha Sala Sentru Mídia COVID-19, iha Sentru Konvensaun Dili (CCD, sigla portugés), segunda ne’e.

Totál kumulativu ezame laboratóriu to’o ohin loron hamutuk 2.118 ho rezultadu negativu hamutuk 1.896 no na’in-198 sei hein rezultadu.

Totál ema iha konfinamentu obrigatóriu hamutuk 83, ne’ebé iha Díli 53 no iha munisípiu sseluk hamutuk 30.

Enkuantu, ema na’in-30 mak sei iha auto-kuarentena, ne’ebé na’in-28 iha Díli no na’in-rua iha munisípiu sira seluk.

Ema ne’ebé kompleta ona loron 14 kuarentena hamutuk 2.534 no husi númeru ne’e na’in-1.997 iha Díli no 537 husi munisípiu seluk.

Iha loron 21 marsu 2020, Timor-Leste rejista kazu pozitivu COVID-19 dahuluk ema na’in-ida no kazu ikus liu rejista iha loron 24 abríl.

Nune’e, totál kazu konfirmadu hamutuk na’in-24 no provável na’in-haat, ne’ebé husi totál konfirmadu ne’e, na’in-22 rejista iha Dili enkuantu na’in-rua seluk rejista iha Munisípiu Liquiçá.

Kazu konfirmadu ne’ebé rejistadu iha Timor-Leste hanesan kazu importadu husi sidadaun ne’ebé halo viajen husi nasaun afetadu COVID-19 no tama mai Timor-Leste liuhosi dalan fronteira terrestre no aeroportu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here