Airnorth atera iha Aeroportu Internasionál Prezidente Nicolau Lobato, sesta (03/04). Imajen Tatoli/António Gonçalves

DILI, 22 juñu 2020 (TATOLI)Selebrasaun kontratu entre Governu Timor- Leste ho Airnorth iha loron 7 abríl, ba ligasaun aérea Darwin-Dili bá-mai atu garante konektividade iha situasaun emerjénsia nia-laran sei termina iha tempu badak, tanba ne’e ba estensaun kontratu Governu sei analiza hafoin deside.

Iha kontratu, Governu Timor-Leste halo charter ba Airnorth hodi halo operasaun semana ida dala-tolu, ho kustu operasaun bá-mai dala ida husi Darwin-Dili hamutuk $15.000, atu garante konektividade iha situasaun emerjénsia nia laran.

Ministru Transporte no Komunikasaun, José Agostinho da Silva, informa kontratu entre parte rua ne’ebé atu tula ekipamentu médiku no ai-moruk, sei ramata iha 27 maiu.

“Airnorth nia kontratu hotu ona no daudaun iha hela prosesu nia-laran. Ha’u orienta ona ba parte tékniku no legál atu konfirma liña ministeriál atu haree ba situasaun jerál, hafoin sei tetu no desizaun koletiva nune’e bele asegura nafatin ita-nia konektividade aérea,” tenik  Ministru José Agostinho ba Agência Tatoli iha Palásiu Governu, segunda ne’e.

Notísia Relevante: Airnorth Lansa Voo Dahuluk Tula Ai-Moruk no Ekipamentu Médiku ba COVID-19

Governante ne’e dehan, parte Ministériu Transporte no Komunikasaun (MTK) prepara ona relatóriu ne’ebé sei esplika kle’an kona-ba operasaun Airnorth husi Darwin-Dili bá-mai durante fulan-rua, hanesan kuantidade voo, kada voo tula saida de’it, atendimentu, sasán no ema na’in hira, gastu finansiamentu ba voo no seluk tan.

“Relatóriu finaliza ona, tanba membru Parlamentu sira mós eziji hela relatóriu relasiona ho kontiúdu husi kontratu Governu Timor-Leste ho Airnorth rasik,” nia akresenta.

Tuir Ministru ne’e, durante hala’o operasaun, parte Airnorth kumpre kontratu ne’ebé selebra ona ho Governu Timor-Leste.

Governu liuhosi Autoridade Aviasaun Sivíl Timor-Leste (AACTL, sigla portugés) iha loron 4 abríl deside suspende provizóriu operasaun komersiál internasionál husi nasaun li’ur hodi evita propagasaun surtu COVID-19.

Akordu hirak ne’e mosu, hanesan resposta ba restrisaun viajen nian ho eskala boot ne’ebé Governu estabelese ona hodi hapara propagasaun COVID-19 no evita atu Timor-Leste labele sai izoladu sein iha konetividade globál ne’ebé mak esensiál ba movimentu merkadoria, fornesimentu médiku sira ka ba transporte pasajeiru sira iha situasaun emerjénsia nia laran

Nune’e mós, atu fasilita tanba Timór seidauk iha aviaun rasik atu asegura ekipamentu médiku no ba kestaun nesesidade emerjénsia karik presiza iha futuru.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here