Imajen iha leten asidente tráfegu hodi rezulta karreta 4Ranger nia oin ka-betok maka’as no motor Honda Beat ne’ebé vítima na’in-rua kondús rahun total. Imajen iha okos, vítima na’in-rua mate iha HNGV. Imajen/Foti husi Facebook

DILI, 21 juñu 2020 (TATOLI)-Vítima na’in-rua husi asidente tráfegu iha kruzamentu One Dollar Beach (ODB), horikalan, hakotu ona iis ka mate iha Ospitál Nasionál Guido Valadares (HNGV).

Notísia Relevante : Asidente Tráfegu iha ODB, Joven Na’in-Rua Liman-Ain Tohar

Vítima ho naran kompletu Francisco de Fatima Soares “Amali” (tinan-20) ho Lepolgido O. F. Ximenes “Alebo” tinan-23 sofre kanek todan no tohar hafoin lori motor honda beat hasoru dezastre asidente tráfegu ho karreta $Ranger metan-ida ne’ebé rezulta karreta oin betok maka’as no motor honda beat ne’ebé Amali ho Alebo lori rahun totalmente.

Asidente ne’e akontese iha sábadu (20/06), iha área kruzamentu One Dollar Beach (ODB), Suku Fatumenta, Postu Administrativu Laclo, Munisípiu Manatuto.

Komandante PNTL Munisípiu Dili, Superintendente Xefe Armendo Monteiro, informa, vítima na’in-rua ne’e mate, tanba liman no ain tohar hotu, hafoin suspeitu ho inisiál AB husi Aldeia 30 de Agusto, Postu Dom Aleixo, Munisípiu Dili ho karreta 4Ranger metan husi dirasaun Manatuto ho velosidade maka soke.

Suspeitu AB konsege halai no dezvia-an, maibé parte PNTL Dili  kaptura hikas nia iha nia família sira nia uma iha Suku Bairru-Pité, no kazu ne’e rasik Komandu PNTL entrega ba Komandu Polísia Munisípiu Manatuto.

Vítima na’in-rua; Amali hela iha Aldeia Salukin, Suku Klakuk, no Alebo husi Aldeia Fatuboe, Suku Fatukahi, Postu Administrativu Fatuberliu, Munisípiu Manufahi. Sira na’in-rua hanesan estudante foun iha Ensinu Superior Institute of Business (IOB).

Antes ne’e, vítima na’in rua mai husi Fatuberliu too Dili atu tama fali eskola, maibé tanba prosesu aprendizajen seidauk la’o normál, ikus mai sira deside atu fila ba Fatuberliu no enfrenta dezastre iha dalan klaran, kruzamentu   One Dollar Beach  nian.

Antes ne’e, Komandante Polisia Munisípiu Manatuto, Superintendente, Júlia da Gama dehan, bainhira Komandu Dili entrega suspeitu ne’e ba sira sei prosesa tuir lei bazeia ba faktu investigasaun iha fatin akontesimentu.

Jornalista       : Eugénio Pereira

Editór             : Francisco Simões

 

HAKEREK NO HATÁN

Please enter your comment!
Please enter your name here