DILI, 19 juñu 2020 (TATOLI)–Jestór Merkadu Manleuana, Julio Caldas, husu ba Prezidente Autoridade Munisípiu Dili atu toma konsiderasaun ba sira-nia preokupasaun kona-ba ahi mate iha momentu kalan hodi perturba ba sira-nia servisu.

Notísia Relevante: UE-UNICEF Sei Apoiu Nafatin Vendedór Sira

“Husu Prezidente Autoridade Munisípiu Dili atu toma konsiderasaun ka hamatan ba ahi mate. Tanba durante ne’e seguransa merkadu Manleuana mak kalan-kalan tuur de’it iha nakukun laran tanba lampu-sorot sira iha merkadu laran aat hotu,” Jestór Merkadu Manleuana, Julio Caldas, ba jornalista sira iha Merkadu Manleuana, sesta ne’e. 

Nia hatutan, lavandária Merkadu Manleuana nian aat durante tinan neen (6), tanba ne’e presiza halo reabilitasaun hodi vendedór sira bele utiliza bainhira sira faan sira-nia sasán iha merkadu ne’e.

“Presiza reabilita ba ami-nia lavandária ne’ebé durante ne’e ho kondisaun aat, tanba hahú hosi 2014 to’o mai agora tanba ida ne’e mak ami husu atu atende preokupasaun ne’e,” dehan Julio Caldas .

Nia dehan, ho Uniaun Europeia (UE) no UNICEF nia apoiu hamutuk ho Diresaun Jerál Água Saneamentu (DGAS) ne’ebé mak ohin ajuda hodi monta tanke bee-moos ba vendedór sira iha Merkadu Manleuana hodi prevene COVID-19.

“Ha’u hanesan Xefe Jestór Merkadu Manleuana hato’o agradese ua’in ba ita-bo’ot sira hotu ne’ebé ohin hiit-aan to’o mai iha fatin ida-ne’e. Iha momentu ida-ne’e, ha’u hakarak hato’o agradese ba UE no UNICEF ne’ebé mak fó apoiu tanki bee-moos nian ba ami,”  nia agradese.

Entretantu, Diretora Jestaun Merkadória no Turizmu, Justina Amaral, hato’o agradese ba UE no apoiu UNICEF ne’ebé ohin  lansa tanke bee-moos lima (5) ba merKadu Manleuna hodi  halo prevensaun  ba COVID-19, husu vendedór kuidadu ho di’ak.

“Ami-nia agradesimentu ba komisaun Uniaun Europeia no Apoiu UNICEF no DGAS, no Saúde Munisípiu Dili nian ne’ebé ho  esforsu-aan tomak bele reabilita merkadu sira iha Munisípiu Dili laran no ohin mai ajuda tan ba Merkadu Manleuana,” nia hateten. 

Ho ida ne’e, nia husu ba vendedór sira atu kuidadu fasilidade ne’ebé oferese ona no tenke halo limpeza loro-loron ba fatin faan ne’e.

“Ba vendedór sira, ita tenke kuidadu-aan nafatin no kumpre nafatin regra ne’ebé fó sai ona hosi Ministériu Saúde no ajénsia katak  distánsia fíziku no sosiál, uza máskara, no fase liman hela de’it. Husu ba komunidade katak atu kuidadu fasilidade ne’ebé ita nia ajénsia sira ne’ebé tau ona iha ne’e,” nia sujere.

Notísia Relevante: MS Husu Negosiante Manleuana Uza Ekipamentu Prevensaun COVID-19 ho Koidadu

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here