Lider Karizmátiku, Kay Rala Xanana Gusmão, hasai fotografia hamutuk ho padre sira iha Igreja Balide, Dili, hafoin partisipa misa agradesimentu ba nia loron aniversáriu ba dala-74, sábadu (20/06/2020). Imajen/Eugénio Pereira

DILI, 20 juñu 2020 (TATOLI)- Kay Rala Xanana Gusmão, ohin, selebra nia aniversáriu tinan-74 (20 juñu 1946-20 juñu 2020). Ba loron espesiál ne’e, Xanana halo atividade simples rua; ida mak halo limpeza jerál iha Jardin Igreja Motaél, Dili, no seluk fali mak selebra misa agradesimentu hamutuk ho amu selebrante sira iha Igreja Balidi, Dili.

Notísia Relevante : Xanana Halo Tinan-74 Ho Limpeza Iha Jardin Motaél

Xanana Gusmão, tanis hodi rei Padre José Figuera iha Igreja Balide, Dili, sábadu (20/06/2020). Imajen/Eugénio Pereira

Ba aniversáriu Komandante Ein-Xefe FALINTIL nian ba dala-74 ne’e, simu votu parabéns oioin husi entidade oioin. Husi komponente  sivíl no militares, inklui konviksaun relijiozu sira iha rai-laran no rai-li’ur.

Liuhusi selebrasaun misa agradesimentu ne’e, lider karizmátiku ne’e hato’o agradese ba povu Timor-Leste no lider partidu polítiku no konviksaun relijioza sira ne’ebé hato’o parabéns no reza ba nia saúde iha loron espesiál ida ne’e.

Manatuto-oan ne’ebé hateke hetan mundu nia roman iha 20 juñu 1946 liubá, hato’o nia respeitu tomak ba amu lulik sira, madre sira, ferik no katuas sira, juventude feto no mane sira ho mós labarik ki’ik sira ne’ebé hato’o ona sira nia orasaun no votu parabéns ba nia diretamente no mós liuhusi rede sosiál Facebook.

“Ha’u agradese tebe-tebes ba  hotu- hotu nia espíritu solidariedade reza ba ha’u ho misa ida ne’e, halo ha’u hanoin iha tinan-40 ba kotuk, 1980 iha Suku Ostiku, Postu Administrativu Vemasse, Munisípiu Baucau,   ami loke unidade hodi funu hahú iha Konsta Súl mai too Sentru Súl,” haktuir  Xanana iha nia lia menon bainhira partisipa misa agradesimentu ba nia loron natalísiu nian iha Igreja Balidi.

Xanana Gusmão, rei Padre José Figuera nia rein-to’os iha Igreja Balide, Dili, sábadu (20/06/2020). Imajen/Eugénio Pereira

Xanana hato’o agradese ba ema hotu ne’ebé partisipa misa no selebra misa iha fatin seluk ba nia atu kontinua moris iha grasa Maromak Nian no vida naruk atu hamriik nafatin iha unidade liu-liu buka kria dame ho ema iha Timor-Leste.

“Iha tempu oras hanesan ne’e, ita hotu buka harii unidade ho domin maka bele lori ita atu moris respeita malu di’ak liután,” dehan Xanana ho mata-wen

Koalia tiha lia hirak ne’e, Xanana hakat ba altar leten ho tanis kumprimenta Padre José Figuera, Padre José Martins, Padre Domingos Maubere ho kaer liman no agradese nai lulik sira ne’ebé sempre fó korajen no akompaña nia viajen moris tomak durante funu iha tempu susar too Timor-Leste ukun-aan.

“Ha’u nia respeita, ba Padre José Figuera no José Martins, Domingos Maubere no padre foin sa’e sira seluk sempre motiva no akompaña nafatin ha’u too mai ohin,” dehan Xanana hodi hakuak metin Padre José Figuera no Padre José Martins

Fatin hanesan, Padre José Figuera no Padre José Martins, Padre Domingos Maubere hato’o parabéns ba Xanana hodi simu ho liman rua ba kuakér dezafiu ne’ebé Xanana hasoru iha ninia moris.

“Ami akompaña no reza nafatin ba ita nia viajen no moris tomak,” dehan Padre José Figuera.

Iha fatin hanesan, Padre Selebrante, Angelo Salsinha dehan, selebrasaun tinan ne’e hanesan grasa ida ne’ebé ema hotu hetan husi Nai Maromak Nia bensaun tomak hodi akompaña ema hotu nia moris.

“Agradese ba di’ak tomak husi Maromak, akompaña ita nia avó Xanana, domin ida ne’e  hanesan aliansa ida ita sukat labele, dala ruma ita sente hamnasa, sente hamnasa no dala ruma ita sente la simu, maibé Maromak Nia domin no kbiit maka fó grasa mai ita, atu ita tane nafatin ho rohan laek hodi simu moris ne’e ho grasa boot,” Padre Angelo Salsinha hateten.

Padre Angelo hatutan, lider karizmátiku, Xanana hakat liu ona dezafiu barak iha nia moris hasoru sofrimentu oin-oin, maibé nu’udar sarani Xanana mós nunka haluha atu hato’o orasaun agradese ba Maromak nia grasa tomak.

“Iha ita nia moris Maromak sempre koko ita, fó justisa mai ita ho nia domin tama too ema hotu nia laran, hodi komprende saida maka moris ne’e,” nia hateten.

Misa agradesimentu ne’e hetan partisipasaun másimu husi lider partidu polítiku sira, kompostu husi partidu CNRT, PD, UDT, PLP no sarani sira  seluk tan.

Remata misa, Xanana selebra festa agradesimentu hamutuk ho padre no partisipante sira iha salaun enkontru Igreja Balide nian.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here