Xefe Bankada CNRT, Duarte Nunes. Imajen Tatoli/Egas Cristóvão

DILI, 20 juñu 2020 (TATOLI)—Bankada Congresso Nacional da Reconstrução de Timor (CNRT) hakarak reprezentasaun Parlamentu Nasionál ba Conselho Imprensa (CI) tenke proporsionalidade.

Xefe Bankada CNRT, Deputadu Duarte Nunes, hateten bankada ko’alia ona asuntu ne’e maibé sei preprara ema ida hodi aprezenta ba Parlamentu Nasionál.

Xefe Bankada CNRT ko’alia asuntu ne’e tanba mandatu Conselho Imprensa ne’ebé lidera hosi Virgílio Guterres ho membru sira hakotu ona iha loron 10 maiu 2020. Loloos ne’e kompozisaun foun iha ona maibé Timor-Leste oras ne’e iha hela períodu Estadu Emerjénsia ne’ebé kauza hosi pandémia COVID-19.

Tuir lei Komunikasaun Sosiál artigu 46 kona-ba mandatu membru Conselho Imprensa ba tinan haat bele hafoun dala ida de’it.

“Ami ko’alia ona maibé labele ansi demais maibé naran ne’e ami aprezenta mak ita boot sira hatene. Tanba ita haree hosi proporsionalidade bankada FRETILIN ida no ami (CNRT) ida tanba uluk mós ami uza proporsionalidade. Se proporsionalidade FRETILIN no CNRT mak iha direitu atu aprezenta proposta. ita espera katak FRETILIN aprezenta ida no ami aprezenta ida ba eleisaun,” dehan nia ba jornalista sira iha sede CNRT, Bairro dos Grilhos, Dili, sábadu ne’e.

Tuir lei Komuniasaun Sosiál nú 5 /2014, 19 novembru, Kapítulu VII estabelse Konsellu Imprensa (CI-sigla portugés), artigu 42 (Natureza no Independénsia), alínea 1, hateten  Konsellu Imprensa nu’udar entidade administrativu independente no hala’o ninia atribuisaun nomós kompeténsia la haktuir diretrís ka orientasaun sira podér polítiku nian.

Nune’e mós artigu 45 husi Lei Komunikasaun kona-ba Kompozisaun Konsellu Imprensa hamutuk membru na’in-lima, ne’ebé atu hili liuhosi dalan tuir-mai:

  1. a) Reprezentante jornalista na’in-rua ne’ebé sira hili tiha ona liuhosi eleisaun;
  2. b) Reprezentante órgaun komunikasaun sosiál ida, ne’ebé órgaun sira hili tiha ona liuhosi eleisaun;
  3. c) Sidadaun na’in-rua ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira na’in-rua ida nu’udar jurista, ne’ebé Parlamentu Nasionál hili.
  4. d) Membru sira Konsellu Imprensa hili entre sira ninia Prezidente.

Artigu 47 husi Lei Komunikasaun Sosiál (Estatutu membru sira-nian) alínea 1 hateten bainhira membru Konsellu Imprensa hala’o knaar sei tau-hamutuk ho ezersísiu atividade profisionál ne’ebé hanesan, sei la selu nein fó subsídiu osan no la iha karatér permanente.

Alínea 2 husi artigu ne’e fundamenta, membru sira Konsellu Imprensa iha direitu ba seña prezensa tuir termu ne’ebé ninia estatutu sei estabelese karik.

Entretantu, parte Timor-Leste Press Union (TLPU) sei hili reprezentasaun ida ba iha Konsellu Imprensa, nune’e mós Asosiasaun Jornalista Timor-Leste (AJTL) mós sei hili nia reprezentante ba tuur iha konsellu ne’e.

 Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here