Reitór Universidade Nasionál Timor Lorosa’e (UNTL), Francisco Miguel Martins. Imajen/Egas Cristovão

DILI, 19 juñu 2020 (TATOLI)-Reitór Universidade Nasionál Timor Lorosa’e (UNTL) Francisco Miguel Martins, husu ba Ministériu Ensinu Superiór Siénsia no Kultura atu fó apoiu mákina termoscan hamutuk 35 hodi prevene transmisaun  surtu COVID-19 bainhira re-ativa prosesu aprendizajen prejensiál.

Tuir planu termoscan 35 sei fahe ba Kampus Sentrál, Liceu Dili,  Hera, no Lahane hodi halo teste ba  temperature isin husi estudante no dosente sira ididak durante prosesu aprendizajen la’o.

“Ha’u husu thermometer digitál 35 ne’e tanba atu fahe ba kampus haat, Kampus Sentrál sei tau termometer haat, iha Liceu sei rai haat, Lahane haat no iha Hera Haat, Fisipol  Caicoli iha haat  hodi nune’e bele kontrola ita nia estudante no dosenta sira,”dehan Nia ba TATOLI iha ninia servisu fatin, ohin.

Alende ne’e husu mós atu apoiu máskara hamutuk 30.000 hodi distribui ba estudante sira.

“Tanba atu realiza atividade akadémiku pelumenus Instituisaun Ensino superiór sira tenki iha ona preparasaun ida másimu tuir regulamentu ka padarun ne’ebé fo sai ona,”nia hateten.

UNTL daudaun ne’e monta ona tanke bee moos ka profile iha resintu UNTL Dili, iha Hera hodi fasilita estudante sira fase liman durante prosesu aprendizajen.

Jornalista : Tomé Amado   

Editór       : Agapito dos Santos

HAKEREK NO HATÁN

Please enter your comment!
Please enter your name here