Embaxador Uniao Eropeia iha Timor Leste, Andrew Jacobs.Imajen/Antonio Goncalves

DILI, 19 juñu 2020 (TATOLI)–Embaxadór Uniaun Europeia (UE) iha Timor-Leste, Andrew Jacobs, hatete Uniaun Europeia atu haforsa kapasidade institusionál no rekursu umanu, no sente orgullu tebes atu suporta esforsu ne’ebé Governu foti hodi harii demokrásia no hadi’ak dezenvolvimentu sosiál ekonómia iha Timor-Leste.

“Uniaun Europeia sai mós xave ida atu haforsa kapasidade isntitusionál no rekursu umanu ne’ebé ho vizaun atu hadi’ak moris no saúde Timoroan sira nian, liu-liu ba inan-feton no labarik sira”, dehan Embaixadór Uniaun Europia (UN) iha Timor Leste, Andrew Jacobs ba jornalista sira iha Merkadu Manleuana iha Suku Manleuana, Postu Administrativu Dom Aleixo, Munisípiu Dili, sesta ne’e.

Atu hadi’ak nutrisaun iha Timor-Leste, nia hatutan, Uniaun Europeia disponibiliza ona miliaun 10 ne’ebé fó direta ba Orsamentu Jerál Estadu no kontribui tan mós miliaun $4.8, liuhosi UNICEF ne’e rasik ho intensaun atu hadi’ak estatutu nutrisaun ba inan isin-rua sira, labarik tinan lima mai kraik, no mós ba feto foinsa’e sira ne’ebé hala’o liuhosi haforsa liután servisu espesífiku.

“Ministériu Saúde nian ba nutrisaun aumenta koñesementu família sira-nian kona ba prátika kuidadu aihan no aumenta prátika ijiéne no saneamentu komunidade sira-nian,” nia dehan.

Tuir nia, asesu ba saneamentu no ijiéne ne’ebé la di’ak sei fó kustu ne’ebé reál sei fó moras oin-oin hanesan má nutrisaun no morte prematura (mate prematura).

Nia haktuir, estudu ikus liu hatudu katak iha ligasaun ne’ebe forti tebes entre saneamentu ne’ebé la di’ak ho má nutrisaun iha labarik sira, ne’ebé maka importante tebes ba dezenvolvimentu kognitivu no produtividade ekonómia iha futuru.

“Ohin loron, pratika ijiéne no saneamentu ne’ebé di’ak sai importante liután relasiona ho pandemia COVID-19 ne’ebé tenke fase liman beibeik ho sabaun, distansiamentu sosiál no fíziku no uza máskara hodi prevene transmisaun moras Coronavirus. Atu kontrola Virus Corona nia da’et, ka moras seluk ne’ebé similár, ne’e resposabilidade individual no mós responsabilidade komunidade iha baze,” nia hatutan.

Embaxadór Uniaun Europia ne’e relata katak estabelesementu fase-liman fatin no fasilidade saneamentu iha Merkadu Manleuana ida-nee hanesan mós parte hosi kampaña rápidu ba ijiéne ne’ebé di’ak no implementa hosi UNICEF no Uniaun Europeia hamutuk ho Administrasaun Munisipiu Dili (AMD).

“Ha’u hakarak enfatiza dala ida tan katak, investe iha saúde públiku ho nutrisaun ne’ebé di’ak, saneamentu no ijiéne mak sai sentru. La’ós ba kombate COVID-19 de’it maibé bele promove mós kresimentu naun petrolíferu ba Produtu Internu Brutu (GDP) iha futuru bele hadi’ak liután kapasidade umanu iha futuru no mós redús morbilidade no mortalidade,” nia esplika.

Ho hanoin hirak ne’e, nia dehan, iha deseju atu merkadu Manleuana bele kontinua implementa ho susesu no halo intervensaun saneamentu no ijiéne ne’ebé sustentavél, parseria ho UNICEF, Ministériu Saúde no AMD.

Jornalista : Osória Maques

Editor      : Cancio Ximenes

HAKEREK NO HATÁN

Please enter your comment!
Please enter your name here