Presidente CCI-TL, Oscar Lima. Imajen TATOLI/Egas Cristovão

DILI, 19 juñu 2020 (TATOLI) – Presidente Câmara de Comércio e Indústria de Timor-Leste (CCI-TL) Oscar Lima, konsidera atu halo rekoperasaun ekonómiku iha Timor-Leste, alternativa unikú maka banku tenke fó emprezáriu sira asesu ba kreditu ho funan ki’ik, nune’e bele hala’o atividade negósiu iha rai-laran ne’ebé bele ajuda normaliza kondisaun ekonómiku.

Nia haktuir, foin daudaun parte CCI-TL hasoru malu ho Komisaun ba Elaborasaun Rekuperasaun Ekonómiku no aprezenta ona dadus kona-ba setór privadu inklui kámara komérsiu nia hanoin.

“Ami rekomenda ba komisaun ne’e, bainhira hakarak atu halo rekopersaun ekonómika labele haluha katak ita presiza orsamentu husi banku. Tanba ne’e, presiza fó ema asesu kréditu ho funan ki’ik hanesan porsentu tolu to’o lima, másimu labele liu lima se lae ema hala’o atividade negósiu ema la manan no ema atu halo serbisu mós menus,” dehan Prezidente CCI-TL, ba Agência Tatoli, iha resintu Parlamentu Nasionál, sesta ne’e.

Nune’e, nia husu atu komisaun ne’ebé lidera husi Rui Augusto Gomes ne’e bele konsidera rekomendasaun ne’e no iha tempu hanesan bele halo ezersísiu maka’as tanba la’ós buat fásil atu normaliza ekonomia rai-laran iha tempu krize globál ne’e.

“Ami husu rekomendasaun husi ami ne’e bele implementa, nune’e bele ajuda ita-nia emprezáriu sira no sira bele barani mós halo atividade iha área agrikultura ka halo industria ki’ik-koan sira,” tenik Oscar Lima.

Nia konsidera atividade negósiu husi setór privadu maka bele iha kresimentu ekonomia tanba iha sirkulasaun osan no bele normaliza filafali atividade ekonomia iha rai-laran.

“Bainhira banku fó kreditu ho funan ki’ik  maka emprezáriu sira barani  halo atividade investimentu ba industria ki’ik sira. Ida-ne’e maka importante liu,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here