Maria Natércia Gusmão Pereira hako’ak Xanana ho tanis no husu Xanana huu nia ulun nu’udar grasa ida husi aman ba oan, sesta (19/06/2020). Imajen/Espesiál

DILI, 19 juñu 2020 (TATOLI)-Lider karizmátiku, Kay Rala Xanana Gusmão, nia peregrinasaun ba munisípiu, hanesan Ermera, Bobonaro, Covalima, dala-ua’in simu ho mate-wen.

Notísia Relevante : Xanana Tanis iha Nuntali

Komunidade sira tanis no lelir hasoru Xanana. Imajen/Eugénio Pereira

La iha ema mak organiza ka haktuir senáriu. Maibé espontaniamente populasaun sira, husi ferik-katuas, joven feto no mane no labarik sira ho ksolok simu prezensa Xanana nian to’o balun tanis no lelir hasoru nia.

Husi hirak ne’ebé lelir no tanis la’ós tanba Xanana lori prenda furak ba sira. Maibé, simplesmente Xanana nia prezensa iha sira-nia leet hanesan esperansa foun no grasa ida ba sira iha situasaun difisil tebes no susar tebes ne’e iha ámbitu estadu emerjénsia no propagasaun surtu Coronavirus ka COVID-19.

Lelir no tanis ne’e, dala ruma bele akontese iha fatin sira area rurál ka munisípiu fora husi Dili, tanba populasaun  kbiit-laek sira difisil tebes atu hasoru Xanana. Sa tan, halimar ka  anima malu ho komandante ein-Xefe FALINTIL, Kay Rala Xanana Gusmão.

Avó-feto sira lelir no tanis hasoru Xanana. Imajen/Eugénio Pereira

Akontese dala-ida tan no halo ema ua’in admira boot, ohin dadeer, purvolta tuku 10:00 Otl, iha ofisina ka rental  ida iha besik Edifísiu Tribunál Rekursu  iha Caicoli, Dili,   inan-feton intelektuál no figura públiku, Maria Natércia Gusmão Pereira, halai hasoru Xanana hodi hako’ak no tanis hasoru Xanana.

Maria Natércia Gusmão Pereira, atuál Juiza iha Tribunál Rekursu, haree Xanana ho nia eskolta sira lori motor roda tolu (Tum-tum) ba monta sticker iha rental ka ofisina kompañia Redijeredo Unipesoál, Lda, besik ho Edifísiu Tribunál Rekursu. Nia Maria Natércia Gusmão Pereira,  halai ba kumprimenta Xanana ho tanis no aproveita tempu hodi hato’o nia votu parabéns ba Xanana ne’ebé aban selebra nia  loron natalísiu ka loron moris nian ba dala-74 (20 juñu 1946-20 juñu 2020).

Xanana ne’ebé taka xapeu no hatais kalsa bada  ho  faru lima naruk la’o hela iha estrada parte Tribunál Rekursu nia oin, derrepente, Maria Natércia ho karreta liuhusi estrada atu tama ba arredores Tribunál Rekursu nian, maibé tanba haree hetan uluk ona Xanana, maka Maria Natércia haruka kondutór para karreta iha portaun Tribunál Rekursu nia oin, hodi tun husi karreta la’o ba hasoru Xanana iha rental ka ofisina nia laran.

Bainhira hasoru Xanana, Maria Natércia Gusmão Pereira, tanis hasoru no hakuak kedas Xanana ho  espresaun tristeza loos. Nia husu Xanana simu nia nu’udar oan-feto ida ne’ebé nunka haluha aman ida nia di’ak tomak, bainhira nia enfrenta difikuldade oioin ka  moras sempre husu korajen no bensaun ba Xanana.

Juiza Maria Natércia Gusmão Pereira, ba Agência Tatoli iha nia rezidénsia, hateten hasoru malu entre nia ho Xanana hanesan oan ho aman ne’ebé nia saudades tebes tanba ne’e emsionalmente halo nia mate-wan turuk ka tanis.

“Ha’u ba hasoru duni, ha’u husu dehan apa huu ha’u  nia ulun lai, ne’e hanesan sentimentu emosionál ida, ha’u konsidera maun Xanana hanesan aman ida la’ós foin, mas dezde uluk kedas tempu rezisténsia ha’u bolu maun boot hanesan ha’u nia aman ida ne’ebé ha’u nunka bele haluha iha ha’u nia moris no entre nia ho ami  iha relasaun nu’udar família, nu’udar oan no aman no ne’ebé ha’u sente katak ne’e hanesan grasa ida ha’u, ha’u nunka atu bele haluha too ha’u mate,”  hateten Maria Natércia Gusmão Pereira .

Nia konsidera Xanana huu nia ulun hanesan grasa ida mai husi aman ida hadomi nia oan feto ne’ebé nia nunka haluha,  uluk iha tempu rezisténsia too tinan 2000, bainhira nia moras, Xanana maka sempre ajuda nia.

“Ha’u labele haluha, baibain ha’u kuandu moras, ha’u sempre husu ha’u nia aman hanesan aman ida hodi huu ha’u nia ulun,” Juiza Maria Natércia Gusmão Pereira hateten.

Nia  klarifika katak, asaun hasoru malu ne’e la iha ligasaun ho situasaun polítika no la iha mós ligasaun ho serbisu ka desizaun Tribunál Rekursu nian kona-ba karta husi partidu CNRT nian.

“La iha relasaun ho kualkér desizaun ne’ebé akontese ho serbisu Tribunál nian,” Juiza Maria Natércia Gusmão Pereira tenik.

Hafoin hasoru malu, Xanana konvida Natércia atu partisipa iha selebrasaun misa agradesimentu ba ninia adversáriu ba tinan-74 ne’ebé sei hala’o iha Igreja Balide, Dili.

Iha parte seluk, Xanana rekoñese, nia huu hikas Maria Natércia nia ulun, nu’udar oan-feto ida ne’ebé nia koñese tinan barak ona.

“Ha’u huu nia ulun, no ha’u koñese nia dezde uluk too agora,” Xanana lia tun hodi responde Agência Tatoli.

Xanana hatutan, nia koñese didi’ak tebes Maria Natércia ho nia kaben Aniceto Longuinhos Guterres, atuál Prezidente Parlamentu Nasional, dezde tempu luta  to’o Timor restaura nia ukun rasik-aan.

Sasin Eduardo Caetano de Sousa no Relize de Jesus Rangel, konta hela kronolojia, Juiza Maria Natércia Gusmão, hasoru malu ho Lider Karizmátiku, Kay Rala Xanana Gusmão, iha Rentál ka Ofisina Kompañia Ridejeredo, Caicoli, Vere Cruz, Dili, sesta (19/06/2020). Imajen/Eugénio Pereira

Asaun espontánea no nakonu ho sentidu emosionál ne’e halo ema barak hakfodak tebes. Eduardo Caetano de Sousa, nu’udar Manajer Kompañia Rental Ridejeredo dehan,  sira sente hafodak tebes, bainhira haree Maria Natércia Gusmão Pereira derrepente la’o tama uma laran tanis hodi kumprimenta no hakuak metin Xanana iha fatin públiku.

“Ami ho avó Xanana tuur ko’alia hela, derrepente mana Natércia tama mai atu kaer liman, maibé avó dehan distánsia sosiál, tanba COVID-19, maibé mana tama mai hakuak avó kaer liman ho tanis nafatin, depois avó kaer mana nia-liman hodi hakuak avó no sira kontinua konversa ho lian neineik kuaze minutu 20 liu, too ikus atu fila ona maka mana Natércia husu avó huu mana nia reen-to’os, hodi dehan lalika hanoin barak, buat hotu liu ona hodi simu buat hotu ho pasiénsia atu buat hotu bele la’o ho di’ak,”  dehan Eduardo  nu’udar sasin.

Relize de Jesus Rangel nu’udar mós traballadór ofisina ka rental ne’e dehan, nia  sente hanoin tebes  bainhira haree Xanana huu Maria Natércia nia ulun hodi husu tenke forsa nafatin simu realidade.

“Ami hanoin tebes, bainhira avó huu mana nia ulun hodi husu tenke forsa nafatin, ami hamriik haree de’it, tanba mana ho tanis dehan nia kleur ona nunka hasoru avó dehan haree de’it iha televizaun, tanba ne’e maka haree avó hodi mai hasoru kedas,” Reliza konta tuir.

Juiza Maria Natércia Gusmão Pereira, moris iha Balibó, eskola liseu iha Maliana no hasai Lisensiatura Direitu iha Bali, Indonézia, hafoin hetan tiha bolsa estudu ida. Liutiha ida ne’e,  simu mós formasaun jurídika no linguístika nian iha Lizboa Portugál.

Iha tinan 2000, hili nia hanesan Juiza Timor-Leste nian ba-dahuluk no hala’o serbisu hamutuk ho Juis internasionál sira, ba Painél Espesiál kona-ba Krime Grave sira iha Tribunál Distritál Dili, pozisaun ne’ebé nia hala’o  to’o tinan 2005.

Iha tinan 2007 to’o 2009, Juiza ne’e hala’o nia funsaun hanesan Prezidente interina Tribunál Rekursu nian. Nia esperiénsia hodi julga kazu sira kona-ba omisídiu, detensaun ilegál, tortura, violénsia seksuál no krime  sira kontra umanidade, nune’e mós ba nia esperiénsia iha negosiasaun hirak ne’ebé iha kontestu ida multilateral fó ba nia hanesan baze ida ne’ebé di’ak tebetebes hodi bele tama ba-iha Tribunál Penál Internasionál (TPI). Daudaun ne’e hala’o ninia funsaun iha Tribunál Rekursu, iha Dili.

Iha loron 8 jullu 2014, Governu hili Juiza Maria Natércia Gusmão hanesan kandidatu Timor-Leste nian ba eleisaun Tribunál Penál Internasionál (TPI) iha Haia. Hahú kedas iha loron 6 agostu 2014, Juiza ne’e hala’o ona programa ida ne’ebé ezije tebetebes ba kandidatura nian, ho entrevista no sorumutuk sira iha Novaiorke, hodi kandidata-aan ba kargu ne’e no hodi hetan votu sira.

Tribunál Penál Internasionál harii iha tinan 1998, bainhira membru-Estadu nian sira 120 aprova Estatutu Roma nian. TPI hanesan organizasaun internasionál independente ida no “Tribunál Penál Internasionál permanente dahuluk, ne’ebé harii hodi tulun atu hapara impunidade husi autór krime hirak ne’ebé mak grave liu no halo komunidade internasionál preokupa, bazeia iha akordu sira.

 Jornalista      : Eugénio Pereira

Editór             : Francisco Simões

1 KOMENTÁRIU

  1. Hein ktk ho asaun espontaneo nb Juiza Maria Natercia Gusmao halo ba MBKXG bele hamate no halakon rumores nb fo’o sai iha medsos ktk MBKXG tanis hakoak populasaun tmb dt hkrk votus

HAKEREK NO HATÁN

Please enter your comment!
Please enter your name here