Sekretáriu Estadu Ambiente, Demétrio do Amaral de Carvalho entrega sertifikadu apresiasaun ba Diretór Kompañia China Harbour Timor, Lda, Wang Wei, iha ninia Gabinete, kinta (19/06). Imajen/Mídia-SEA

DILI, 19 juñu 2020 (TATOLI) – Governu liuhosi Sekretaria Estadu Ambiente (SEA) atribui sertifikadu apresiasaun ba kompañia China Harbour tanba kumpre prosedimentu ambientál iha ámbitu hala’o atividade dulas fatuk iha Kaitehu, Suku Mota-Ulun, Postu Aministrativu Bazartete, Munisípiu Liquiçá ba obra Portu Tibar.

Sertifikadu ne’e entrega direita husi Sekretáriu Estadu Ambiente, Demétrio do Amaral de Carvalho ba Diretór Kompañia China Harbour Timor, Lda, Wang Wei.

“Ohin atribui sertifikadu apresiasaun tanba empreza ne’e halo esforsu hala’o tuir prosedimentu ambientál sira inklui sira-nia kompromisu ba mekanizmu atu kuda filafali ai-parapa, ahu ruin, duut tasi no komponente ekolójiku seluk,” tenik Sekretáriu Estadu Demétrio ba Agência Tatoli, iha nia kna’ar fatin, sesta ne’e.

Notísia Relevante: China Harbour Halo Ona Rebentamentu Fatuk Dahuluk Iha Suku Mota Ulun

Tuir governante ne’e, sertifikadu apresiasaun ne’e loloos atribui ona iha selebrasaun loron mundiál ambiente iha loron 5 juñu, maibé la konsege.

Nia konsidera empreza xineza hatene jere risku ambientál hodi la viola lisensa ambientál ne’ebé atribui ona tanba bainhira dulas fatuk tenke kumpre regra atu labele halo rai-rahun namkari hodi afeta ba komunidade sira inklui kria zetty ida iha Ulmera hodi la estraga ahu-ruin sira.

Maski empreza ne’e konsege estraga ai-parapa, ahu-ruin no du’ut tasi balun iha fatin naturál ne’ebé koverte ona ba portu, maibé iha ona mekanizmu obrigatoriamente atu kuda filafali ektare haat no volutariamente tenke halo liu ektare 15 ba konservasaun ai-parapa, zona ahu-ruin no du’ut tasi iha Ulmera no fatin balun.

Antes ne’e, Diretór Kompañia Wang Wei, informa atividade konstrusaun Portu Tibar ne’ebé antes ne’e konsege suspende, daudaun ne’e la’o filafali no to’o fulan-maiu progresu fíziku konstrusaun atinje ona porsentu 30.

Konstrusaun Portu Baía Tibar ho modalidade Parseria públika Privada (PPP) husi konsórsiu Governu Timor- Leste aloka hamutuk millaun $130 no Timor Port inklui Bolloré hamutuk millaun $140, ho totál millaun $270 ba faze inísiu, nune’e totál investimentu orsamentu ba Portu Tibar to’o tinan 30 ho valór millaun $500.

Timor-Leste sei iha portu ho performa ne’ebé a’as ho nia distánsia kilómetru 12 husi kapitál Dili no sei sai hanesan portu ne’ebé boot liu iha Timor-Leste no infraestrutura sei aumenta kapasidade ba volume importasaun no esportasaun.

Portu ne’e harii iha rai ektare 27 no sei iha doka ho métru 630.

Konstrusaun ne’e sei hala’o durante tinan tolu, hahú loron 30 agostu 2018 no tuir planu sei ramata iha 30 agostu 2021.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here