Komunidade Atauro hao manutensaun ba bee ne’ebé kanalizadu hosi AldeiaBerau, Suku Makadade. Imajen/Filipe Ximenes.

DILI, 19 juñu 2020 (TATOLI)–Administradór Postu Administrativu Ataúro, Mateus Belo hateten, Ataúro presiza apoiu hosi Governu Sentrál atu bele halo jestaun ba bee-moos ne’ebé durante ne’e distribui ba povu tanba komunidade nia kbiit la to’o atu halo jestaun ba bee-moos ne’ebé ho volume boot ho nia distánsia dook tebes.

Mateus Belo hateten, sistema bee-moos ne’e monta tiha ona no harii hosi Governu Portugés liuhosi ninia misaun iha Timor-Leste desde tinan 2006, hodi fó apoiu halo instalasaun no kanalizasaun.

“Bainhira monta Sistema ne’e konsidera katak Ataúro hola parte iha área rural, entaun sistema rurál ne’e, tuir ita nia dekretu Governu katak nain ba sistema ne’e mak komunidade. Signifika, bainhira sistema urbana karik, ne’e Governu rasik mak instala no komunidade bele selu deit liuhosi monta kilometrazen ba bee-moos ne’e,” dehan Mateus Belo ba Agência TATOLI liuhosi telefonika, sesta ne’e.

Nia hatutan, ida ne’e la’ós hare de’it bee-moos iha parte tékniku maibé parte sosiál mos hahú kedas iha inísiu forma kedan grupu iha komunidade, iha nível aldeia no suku to’o nível postu ho naran Grupu Jestaun Fasilidade (GJF) atu bele tau matan ba bee-moos ne’e.

“Ami dala barak ona ejize katak, iha Ataúro  ita konsidera Suku Vila-Maumeta ho Beloi bele tama ona katak Governu mak bele halo ona intervensaun. Tanba, kleur ona ita la’o ho kontribuisaun hosi komunidade kada fulan kontribui $1, ne’e labele koresponde. Tanba, sistema kanalizasaun ne’e liu hosi área ne’ebé mak perigozu, fatuk laran, rai naruk, kanu sira mós agora feruzen hotu ona. Kanu sira iha fatuk lolon ne’e komesa aat ona. Bainhira halo manutensaun, ita presiza orsamentu ne’ebé boot uitoan no $1 kada familia ne’e la to’o,” Mateus esplika.

Nia hatutan, aumenta tan agora mundu enfrenta ona surtu COVID-19 no estadu emerjénsia, komunidade atu kontribui de’it $1 mós labele tanba susar duni atu hetan osan.

“Haree ba Governu ne’ebé moris de’it ho orsamentu duadésimu, labele fó apoiu parte téknika, liuliu materiál sira, no ida ne’e mak sai hanesan difikuldade boot ida kona-ba jestaun no manutensaun kanalizasaun bee iha illa ne’e,” nia dehan.

Maski nunee, Mateus rekoñese katak komunidade iha Ataúro iha konsiénsia makaas hodi hadi’a bee-kanu ne’e, tanba bee-matan sira iha vila no Beloi mós agora menus ba daudaun ona, no úniku bee matan Berau mak povu  ne’e tau espersansa. Nune’e, maski ho osan uitaoan hosi komunidade rasik, sira iha nafatin korajen atu bele halo manutensaun.

“Hau haoin tanba Sistema instalasaun bee iha Berau ne’e Sistema ne’ebé boot. Tanba ne’e mak ami hosi autoridade postu administrativu sei koko atu hato’o proposta liuhosi autoridade munisipál nian, liuliu Governu sentrál tenke halo intervensaun tanba komunidade rasik halo esforsu másimu maibé kbiit la to’o liuliu iha kapasidade finanseiru,” nia promete sei subete proposta.

Entretantu, Xefe Suku Vila-maumeta Filipe Ximenes rekoñese katak kada fulan, kada uma kain kontribui $1 no hosi $1 ne’e mak fahe ba parte rua, sentavus 0,50 rai hela iha fundu suku nian no dsentavus 0,50 fó ba GJF atu bele uza hodi fasilita ekipa ne’ebé halo manutensaun ba sistema bee-moos ne’e.

Komunidade Atauro hao manutensaun ba bee ne’ebé kanalizadu hosi AldeiaBerau, Suku Makadade. Imajen/Filipe Ximenes.

“Tanba atu halo manutensaun ne’e ita la’o ho distánsia lubuk ida, nune’e ita presija aluga ró no mós ita presiza hahan. Tanba área ba Berau ne’e mós kanu sira halai hosi rai naruk no fatuk lolon. Problema ba ami maka ne’e, sistema ne’e hanesan sistema ida ne’ebé boot liu, ho nia distánsia kuaze kilometru 20 ho kanu ninia medida mós boot liu (4 inch). Loloos ne’e Governu mak tenke halo jestaun tanba kapasidade komunidade nian la to’o,” dehan xefe suku ne’e. 

Oras ne’e daudaun, nia dehan, kapasidade bee ne’e boot maibé komunidade laiha kapasidade atu halo jestaun oinsá distribui hotu ba komunidade. Oras ne’e daudaun, autoridade fahe oráriu kada loron rua, uama kain ida bele kuru dala ida iha oras ida de’it.

Bee ne’e rasik distribui ba suku haat maka hanesan Suku Makili, Villa-Maumeta, Beloi  no Suku Bikeli.

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here