Prezidente Komisaun ba Elaborasaun Ekonómika, Rui Augusto Gomes. Imajen Tatoli/António Gonçalves

DILI, 18 juñu 2020 (TATOLI) – Prezidente Komisaun ba Elaborasaun Rekuperasaun Ekonómika, Rui Agustinho Gomes, hateten komisaun ne’e sei foku ba empregu produtivu iha rai-laran.

“Kona-ba planu, tanba agora surtu COVID-19 ne’e afeta maka’as liu ba ema nia rendimentu no empregu, entaun foku maka’as liu mak haree proteje ema no proteje ho saida. Proteje katak asegura nia rendimentu no nafatin iha empregu ne’ebé la’ós vulnerável hanesan serbisu aban no bain-rua lakon serbisu, maibé empregu ida produtivu,” tenik Agustinho Gomes ne’e iha Palásiu Governu, hafoin membru simu pose, kinta ne’e.

Nia konsidera traballadór sira presiza iha seguransa, nune’e bainhira serbisu no hetan rendimentu bele sustentável.

“Ida-ne’e maka ita hakarak atu halo tanba ho rendimentu ho empregu mak kresimentu ekonomia ne’e bele sa’e, tanba osan laiha ema labele konsumu no konsumu laiha demanda prokura mós labele sa’e,” nia akresenta.

Tuir eis Ministru Planeamentu no Finansa ne’e, serbisu ba rekuperasaun ekonómika kompleksu tanba preparasaun planu ne’e enkaixa iha situasaun ne’ebé senáriu makro-ekonómiku mundiál iha inserteza barak, iha parte ida tanba ladún hatene loloos kresimentu ekonómika nasaun sira iha tinan oin maka komisaun ne’e sei presiza hahú análiza situasaun iha rai-laran hodi halo preparasaun.

“Aruma uma-laran kona-ba aspetu ne’ebé afeta ba produtividade, tanba buat sira ne’e maka impede kresimentu,” nia subliña.

Rui Gomes dehan, presiza hadi’a mós étika serbisu tanba la’ós aloka de’it osan ba área ekonomia, área ne’e bele buras ona.

“Hanesan ai-oan ne’ebé ita rega demais ai ne’e mós mate, bainhira ita tau adubu barak liu mós nia mate, entaun halo nusa mak ai-oan ne’e labele mate ita presiza rekupera nia hafoin iha situasaun normál ita mantein to’o nia forte,” nia realsa.

Durasaun servisu komisaun ne’e iha durante loron-60 hodi prepara planu ba rekuperasaun ekonómika no elaborasaun planu sei aprezenta ba Konsellu Ministru.

Nia refere kona-ba orsamentu ba rekuperasaun nian sei prevee iha orsamentu 2021, tanba planu ne’e kontempla iha planu multi-anuál, tanba sei la lakon perspetiva to’o 2030 tanba iha 2030 hanesan tinan rohan ba Planu Estratéjiku Dezenvolvimentu Nasionál (PEDN) no Objetivu Dezenvolvimentu Sustentaável (ODS).

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here