Sekretáriu Estadu ba Protesaun Sivíl, Alexandrino de Araújo. Imajen/Egas Cristóvão

DILI, 19 juñu 2020 (TATOLI) – Bainhira Governu finaliza ona prosesu pagamentu subsídiu $200 ba kada uma-kain iha territóriu nasionál, Sekretáriu Estadu Protesaun Sivíl (SEPS) avansa kedas ho distribuisaun apoiu rekuperasaun ba família uma-kain 1317 ne’ebé afetadu ba dezastre naturaís iha territóriu nasionál.

Notísia Relevante : SEPS Distribui Ona Apoia Emerjénsia ba Vítima Dezastre Naturaís 1031

Família afetadu dezastre naturaís sira-ne’e rejistadu iha SEPS dezde tinan 2018 no 2019 bainhira mosu dezastre udan ho anin boot iha territóriu nasionál.

“Distribuisaun apoiu rekuperasaun ne’ebé atu hala’o husi munisípiu 12 la inklui Rejiaun Administrativu Espesiál Oe-cusse Ambeno (RAEOA),”  hateten Sekretáriu Estadu SEPS Alexandrino Araujo Xavier, ba jornalista liuhusi konferénsia imprensa ohin, iha edifísiu SEPS, Caicoli, Dili.

Foin lalais ne’e, SEPS  distribui ona apoiu rekuperasaun ba família 90 husi Munisípiu Dili, maibé depois ho prosesu pagamentu subsídiu nian ne’ebé Ministériu Solidariedade Sosiál no Inkluzaun (MSSI) halao, entaun deside suspende distribuisaun ne’e.

SEPS mós halo ona komunikasaun ho autoridade lokál hotu nune’e hafoin pagamentu refere hotu, iha jullu ne’e bele kontinua lalais.

SEPS Alexandrino Araujo Xavier husu komunidade afetadu sira atu bele pasiénsia hodi hein no espera apoiu Governu nian bele hakmaan komunidade sira hodi hadi’a hikas sira-nia uma ne’ebé hetan estragu.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here