Presidente Câmara de Comércio e Indústria de Timor-Leste (CCI-TL), Oscar Lima. Imajen Tatoli/Egas Cristovão

DILI, 19 juñu 2020 (TATOLI)Presidente Câmara de Comércio e Indústria de Timor-Leste (CCI-TL) Oscar Lima, informa iha tempu badak parte CCI-TL sei forma ekipa ida atu halo levantamentu dadus ba empreza sira ne’ebé afetadu situasaun impase polítika no COVID-19.

Emprezáriu ne’e nota, antes iha situasaun COVID-19, Timor-Leste atravesa ona situasaun ne’ebé maka difísil hanesan impase politíka, ne’ebé prátikamente hahú husi 2017 to’o 2020, ikusmai orsamentu 2020 xumba iha Parlamentu Nasionál.

“Situasaun ne’e lori impaktu boot, hafoin tama kedan ho COVID-19 ne’ebé halo emprezáriu barak makan taka atividade negósiu no hapara traballadór tanba situasaun mak obriga. Nune’e mós ita tenke asegura Governu nia orientasaun katak ita hotu tenke hela iha uma tanba Estadu Emerjénsia,” dehan Prezidente CCI-TL ba Agência Tatoli iha resintu Parlamentu Nasionál, sesta ne’e.

Nia observa, situasaun sai piór liután bainhira laiha sirkulasaun osan tanba emprezáriu sira la halo atividade negósiu no hapara kontratu traballadór sira.

Tuir nia, bainhira iha situasaun surtu nia laran maka atu halo levantamentu dadus foun ne’e susar maibé parte CCI-TL halo nafatin esforsu no prepara ona ekipa, nune’e iha tempu badak presiza tun halo levantamentu dadus konkretu hodi hatene loloos empreza hira maka ninia atividade taka durante pandemia globál ne’e.

Tanba ne’e, nia espera VIII Governu ne’ebé maka hetan apoiu husi Parlamentu ho kadeira maioria daudaun ne’e bele rekupera fali situasaun dadaun.

“Ita iha esperansa ba Governu, tanba ita iha Governu ne’ebé hetan apoiu Parlamentu Nasionál kuaze 36 kadeira. Espera katak orsamentu mai labele xumba tan, tanba bainhira xumba ita laiha osan no labele halo buat ida iha rai ida-ne’e,” nia hateten.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here