Reklamasaun konsumidór ba servisu telekomunikasaun. Imajen/Espesiál

DILI, 19 juñu 2020 (TATOLI) – Autoridade Nasionál Komunikasaun (ANC, sigla portugés) elabora ona ezbosu kona-ba Regulamentu ba Reklamasaun no Disputa Konsumidór, nune’e bainhira iha keixa ruma husi konsumidór kona-ba servisu operadór telekomunikasaun maka sei aplika regulamentu ne’e.

Prezidente ANC, João Olívio Freitas, informa tinan kotuk halo ona konsultasaun ho operadór Timor-Telecom, Telkomcel no Telemor no sira fó ona sira nia opiniaun kona-ba ezbosu ne’e.

“Konsultasaun ita hetan hotu ona agora finalizasaun ba ninia kompilasaun finál ne’e ANC sei halo hela no espera tinan ne’e tama iha vigór. Bainhira aplika ona maka iha konsumidór ida halo reklamasaun ba operadór telekomunikasaun sira nia servisu, nia bele hato’o keixa ruma hasoru operadór maibé tuir prosedimentu ne’ebé maka ANC define,” tenik Jerente ne’e Agência Tatoli, iha ninia kna’ar fatin, Caicoli foin lalais ne’e.

Konsultasaun públiku autoridade ne’e halo liuhosi ninia pájina ofisiál no mós rádiu hodi fó resposta husi parte hotu ne’ebé atu kontribui hanoin, liuliu ba operadór sira, tanba lejizlasaun ne’e sei lori impaktu ba ema-nia moris.

Tuir João Olívio, prosedimentu hirak ne’e bainhira estabelese kliente no operadór tenke halo tuir, bainhira kliente ida nia hakarak halo reklamasaun ba servisu ne’ebé oferese husi operadór, operadór iha devér atu trata keixa no reklamasaun tuir prosedimentu.

“Iha protesaun konsumidór hakerek klaru liu, tanba ne’e bazeia ba artigu iha lei ne’e maka ita prepara regulamentu simples ne’ebé ema bele komprende no bele ezekuta prosedimentu no lala’ok,” nia akresenta.

Nia realsa, iha lejizlasaun ne’e bainhira entre konsumidór no operadór labele iha konkordánsia no labele rezolve problema ida, prosesu tuir mai maka disputa.

“Iha inísiu estatutu husi keixa ne hanesan reklamasaun, maibé bainhira reklamasaun labele hetan rezolusaun no labele rezolve entaun estatutu husi reklamasaun sai ba disputa. Bainhira parte rua labele rezolve ona maka ANC tama hodi rezolve,” Prezidente ANC subliña.

Iha estatutu ne’e mós define, bainhira konsumidór ida uza servisu operadór telekomunikasaun maka nia labele ko’alia no konsumidór ne’e la satisfaz, maka parte ne’ebé hakarak hato’o keixa bele delega ninia direitu ba ema ida hodi ko’alia ho operadór uza ema ne’ebé hato’o keixa nia naran.

“Ida-ne’e inklui mós iha regulamentu ne’e. Ita bele fasilita se de’it hanesan konsumidór husi servisu telekomunikasaun bele hato’o reklamasaun”, nia esplika.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here