Lider karizmátiku, Kay Rala Xanana Gusmão, hatudu nia respeitu no domin boot ba Madre hodi rei Madre nia-liman. Imajen/Eugénio Pereira

ERMERA, 18 juñu 2020 (TATOLI) – Lider karizmátiku, Kay Rala Xanana Gusmão, apresia ho inisiativa populasaun Suku Atara, Postu Administrativu Atsabe, Munisípiu Ermera, tau osan hamutuk hodi harii rasik kapela hodi hametin sira-nia fiar nu’udar sarani Katólika.

Notísia Relevante : Igreja Apresia ho Asaun Karidade Xanana no La Merese Politiza

Lider karizmátiku, Kay Rala Xanana Gusmão hala’o enkontru ho komunidade sira iha Suku Atara, Postu Administrativu, Atsabe, Munisípiu Ermera. Imajen/Eugénio Pereira

Xanana dehan, inisiativa sarani Atara sai ezemplu di’ak ba sarani sira, oinsá ajuda Igreja Katólika bele dezenvolve di’ak liután ninia dezenvolvimentu infraestrutura iha komunidade sira nia leet hodi hametin liután fiar Timoroan sira nian.

“Imi nia inisiativa ne’e di’ak, tebe-tebes, ita la presiza hein Governu, maibé imi rasik tau osan harii kapela boot hanesan ne’e la’ós buat fasil,” hateten Xanana, bainhira  vizita ba haree direita konstrusaun kapela refere iha Suku Aitara, segunda ne’e.

Xanana dehan, inisiativa sira hanesan ne’e sai ezemplu ba sarani Katólika iha munisípiu seluk hodi ajuda Padre no Madre sira atu fasilita sarani sira ativu partisipa iha misa hodi hametin sira-nia vida espirituál no sai mahein iha vida espirituál ba família ida-idak.

Iha fatin hanesan, Xefe Suku Atara, Angelo Pereira, klarifika katak kapela ho andár-rua ne’e sarani sira rasik maka harii hahú tinan 2019, tanba haree ba kapela antigu ne’ebé uluk sira harii komesa aat ona. Nune’e iha tinan 2012 intelektuál Atara-oan sira ho sarani no autoridade sira hala’o enkontru oinsá rekolla osan harii kapela ne’e.

Iha reuniaun ne’e Atara-oan sira deside, kada família tau $30, Funsionáriu Públiku $100, Veteranu $100, no joven feto-mane ne’ebé servisu iha Koreia do Súl, Austrália no Inglaterra tau osan $250 no emprezáriu Atara-oan kada ema $1000. Husi kontribuisaun ne’e sira konsege rekolla osan hamutuk $38.000.

Fundus seluk hetan mai husi Gabinete eis Prezidente Repúblika, Taur Matan Ruak, no hetan mós apoiu husi Gabinete Prezidente Repúblika, Francisco Guterres Lú Olo apoiu $2.000 no apoiu seluk tan oferese husi Intelektuál Atsabe-oan, Jacinto Rigoberto apoiu simente saka 100 no sasán infraestrutura seluk tan.

“Atu kontinua harii kapela ne’e ba oin, ami menus ona fundus, tanba ne’e ho vizita ami nia aman no maun boot Xanana bele ajuda ami fundus bele halo remata konstrusaun ne’e” dehan Xefe Suku Atara.

Nia dehan, fundus ne’ebé sira presiza tan orsamentu ho montante $25.000, hodi halo konstrusaun remata iha tinan ne’e hodi halo inaugurasaun.

“Ami husu ba Maun Boot Xanana atu bele ajuda ami buka doadór sira atu bele ajuda ami ho fundus $25.000 para bele konklui konstrusaun kapela ida ne’e,” nia hateten.

Autoridade suku ne’e dehan, iha Postu Administrativu Atsabe iha suku 12, no iha Postu Atsabe B iha suku lima hanesan, Atarau, Lacão, Obulo, Laobonu no Batmanu presiza tebes Governu liuhusi Ministériu Edukasaun atu bele harii tan Eskola Públika Sekundária ida hodi ajuda povu nia oan bele asesu ba edukasaun ho di’ak liután.

Kona-ba fundus atu konstrui kapela ne’e, Xanana dehan nia labele promote, maibé sei halo esforsu hodi buka fundus ajuda konstrusaun ne’e bele remata.

Nia dehan, Governu ne’ebé kaer ukun durante ne’e kria kooperasaun di’ak tebes ho Igreja Katólika Dioseze Maliana, Dili no Baucau, tau fundus hodi ajuda Igreja sira inklui apoiu mós komunidade musulmanu hadi’a kondisaun Masjid Kampu Alor  no ajuda konstrui fatin reza Budista sira nian.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here