Sekretáriu Estadu Terras no Propriedades (SETP), Mário Ximenes. Imajen/ António Goncalves.

DILI, 18 juñu 2020 (TATOLI)- Sekretáriu Estadu Terras no Propriedade (SETP), Mario Ximenes, lori Governu nia naran husu ba  sidadaun ne’ebé utiliza rai ho uma Estadu nian tenke rejistu hodi nune’e Estadu bele regulariza selu taxa.

Notísia Relevante : Arrenditáriu 4225 La Selu Arrendamentu Ba Estadu

Polítika oitavu Governu nian liuhusi SETP hala’o ona kampaña informasaun iha territóriu no sei kontinua, atu fó koñesimentu kle’an ba sidadaun hotu ne’ebé uza patrimóniu  estadu nian atu bele rejistu hodi Governu liuhusi Diresaun Nasional Terras no Propriedade (DNTP) bele administra.

SETP Mario Ximenes, esklarese katak, esforsu ne’ebé iha durante nia mandatu tinan ida resin konsege rejista tan númeru foun ba sidadaun hamutuk nain-4200-liu iha territóriu ne’ebé utiliza patrimóniu Estadu nian hanesan rai ho uma (uma dinas ne’ebé Indonézia husik hela).

“Ita-nia sidadaun sira-ne’e mai ho voluntáriu rejistu no hakarak atu regulariza sira no prontu atu selu arrendamentu ba Estadu,” informa  Mario Ximenes, hodi responde Agência Tatoli iha nia servisu fatin iha Dili, kuarta ne’e.

Tuir lei iha kódigu sivíl (Atribuisaun por uzo de canpião) inklui lei rai númeru 13/2017 definisaun titularidade ba sidadaun ne’ebé utiliza rai ho uma Estadu halo kontratu hodi selu arrendamentu depende kontratu ba longu prazu no depende kustu selu, kuandu viavel selu to’o tempu bele entrega definisaun titularidade refere, maibé sei haree mós kritéria iha lei operasionál atu deside ho nia kritéria sira hanesan haree ba ema ne’e okupa rai ne’e tinan hira ona inklui kritéria sira seluk, maibé mós haree ba kategoria rai hanesan iha rai estratéjiku sira Estadu hanoin atu dezenvolve buat ruma sei la permite ba ema ne’ebé hakarak halo kontratu to’o definisaun titularidade.

Mario Ximenes esplika prosesu kuandu sidadaun hirak ne’e halo ona rejistu ekipa husi Terras no Propriedade sei tun fila-fali ba iha terrenu hodi verifika no sukat rai ho loloos hafoin estabelese presu no kontratu nune’e bele selu arrendamentu.

Mario Ximenes hateten, tanba ho problema menus rekursu no situasaun COVID-19 ba daudaun ne’e ekipa SETP seidauk bele tun ba terrenu. Maibé situasaun hotu kuandu la’o estavel sei tun hodi halo fali verifikasaun.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here