Diretora Munisipio Dili, Agostinha Segurado.Imajen/Antonio Goncalves

DILI, 18 juñu 2020 (TATOLI)-Diretóra Munisípiu Dili, Agostinha Segurado, hateten ba futuru presiza atu aumenta tan profisionál Saúde iha Dili hodi koloka ba Postu Saúde no Sentru Saúde iha área remotas hanesan Postu Administrativu Atauro no Metinaro.

Liga ba planu estrantéjiku nasionál dezenvolvimentu rekursu umanu iha setór saúde ba tinan 2020-2024, Servisu Saúde Munisípiu Dili presiza aumenta tan enfermeiru, médiku, parteira no seluk tan.

Notísia Relevante :MS Lansa Planu Estratéjiku Dezenvolvimentu Rekursu Umanu ba Tinan Haat

”Ita nia médiku, enfermeiru, parteira ho aliadus ne’ebé mak agora daudaun iha Munisípiu Dili no hala’o kna’ar hanesan profisionál saúde hamutuk 400-resin,”dehan nia bainhira partisipa serimonia lansamentu planu estratéjiku nasionál dezenvolvimentu rekursu umanu iha setór saúde, iha Otél Novo Turizmu, ohin.

Husi númeru profisionál ne’ebé  hala’o servisu iha Dili nian defisil atu atende hotu totál populasaun iha Munisípiu Dili nian.

Notísia Relevante :UNTL Prontu Kontribui Rekursu Umanu ba Ministériu Saúde

Tuir planu kada postu saúde ida tenki kompleta ona ho médiku ida no enfermeiru rua, parteira rua no farmasia na’in ida.

”Ba futuru ita presiza tan koloka ba iha área remotas hanesan ba Postu Administrativu Atauro no Postu Administrativu Metinaro entaun ida ne’e bazeia ba planu estratéjiku katak postu saúde ida tenki kompleta rekursu umanus hanesan médiku, enfermeiru, parteira no farmasia,”nia dehan.

Munisípiu Dili iha postu saúde hamutuk 19, maibé husi númeru ne’e iha postu saúde neen maka prienxe ona kritéria hanesan iha médiku, parteira, enfermeiru no farmasia, maibé restu seidauk.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here