Kontra-atake entre jogadór SLB no Assalam. Imajen Mídia LFA

DILI, 18 juñu 2020 (TATOLI)-Sekretáriu Estadu Juventude no Desportu oras ne’e seidauk bele re-ativa atividade desportu sira tanba sei hein hela karta autorizasaun husi Ministériu Saúde relasiona ho propagasaun surtu COVID-19 iha Timor-Leste.

Diretór Jerál Desportu SEJD, David Tomas de Deus, informa SEJD haruka ona pedidu ba Primeiru-Ministru, Taur Matan Ruak, atu re-ativa atividade desportu sira.

“Foin lalais Sekrétariu Estadu hakerek ona karta ida ba Primeiru-Ministru atu re-ativa atividade desportu sira, maibé Primeiru-Ministru hatun despaixu ba Ministeriu Saúde entaun ita sei hein hela matadalan balun hosi Ministeriu Saúde nune’e mak foin bele re-ativa,” dehan nia ba TATOLI iha SEJD Lecidere, ohin.

SEJD sei re-ativa atividade desportiva ba jogadór sira hafoin Ministériu Saúde aprova ona despaixu no matadalan hodi kumpre bainhira re-ativa atividade refere.

“Matadalan ne’e tun mai ita sei haree lai sé autoriza ita bele loke hikas atividade desportu hanesan baibain, sé presiza kritéria ruma atu ita halo tuir entaun ita tenke halo tuir,”tenik tan.

Entretantu, antes ne’e Federasaun Futeból Timor-Leste (FFTL)mós haruka ona karta ba SEJD,  Sentru Integradu Jestaun Krize (CIGC-sigla portugés) no Polisia Nasionál Timor-Leste atu re-ativa atividade desportu sira hafoin paradu durante fulan tolu relasiona ho moras COVID-19.

Maibé parte hirak ne’e seidauk fó resposta ba FFTL hodi re-ativa atividade desportu.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here