Logotipu TDD. Imajen Tatoli/Egas Cristóvão

DILI, 18 juñu 2020 (TATOLI) – Tribunál Distritál Dili (TDD) liuhusi prosesu sumáriu liberta arguidu KG husi sala detensaun ne’ebé deskonfia kondús karreta soke mate vítima JM iha area Matiaut, Dili, foin lalais ne’e.

Juis Ivan Suritai,  hasai desizaun ne’e tanba ho promosaun prova ne’ebé aprezenta husi Ministériu Públiku la kondís ho akontesimentu iha terrenu no haree ba prazu detensaun iha sela liu ona oras 72.

Mezmu liberta husi sala detensaun, maibé arguidu kontinua submete ba prosesu justisa tuir lei ne’ebé iha hodi hein julgamentu normál tuir mai.

Tuir faktu ne’ebé arrola husi Ministériu Públiku, katak iha loron 14 juñu 2020, por volta tuku 17:00 Otl, arguidu KG ho família hala’o pasa ferias ne’ebé kondús hela karreta to’o iha area Metiaut, Dili no vítima JM ho kondisaun lanu ne’ebé tenta halai motor ho velosidade maka’as nune’e halai satan netik hodi kona karreta nune’e hodi rezultadu vítima monu no mate fatin.

Hafoin akontesimentu ne’e, Polísia Nasionál Timor-Leste (PNTL) husi unidade tránzitu to’o kedas iha fatin hodi halo identifikasaun rekolla dadus no halo apreensaun objetu sira inklui detein arguidu KG iha sela detensaun hodi kumpre oras 72.

Ho identifikasaun polísia nian ne’e, haktuir katak, vítima mak ho kondisaun lanu ne’ebé kondús motor halai satan arguidu ne’ebé mós kondús hela karreta hodi rezulta vítima ida-idak monu.

Haree ba aktu krime ne’ebé rezulta vítima JM mate, MP promove arguidu ho krime omisídiu neglijente ne’ebé prevista iha artigu 140 kódigu penal Timor-Leste, ne’ebé hatete, ema ne’ebé tanba neglijensia, oho ema seluk sei hetan pena prizaun to’o tinan-haat ka pena multa, nune’e mós iha kazu ne’ebé ajente atua ho neglijensia groseira nia sei hetan pena prizaun to’o tinan-lima (5).

Defeza, Miguel Acácio Farria ne’ebé fó asisténsia legal ba arguidu hateten, desizaun Tribunál nian ne’e fundamentu tanba bazeia ba identifikasaun polísia nian ne’e vítima mak ho kondisaun lanu ne’ebé kondús motor halai satan arguidu ne’ebé mós kondús hela karreta.

Arguidu mós iha prosesu funerál matebian nian fasilita ona sosa kaixaun inklui selu indemnizasaun ho osan natoon hodi haloot matebian.

Prosesu Sumáriu ne’e prezide husi Ivan Suritai, Ministériu Públiku reprezenta husi Prokuradór Jacinto Babo no arguidu hetan asisténsia legal husi Advogadu Privadu Miguel Acácio Farria.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here