Primeiru-Ministru, Taur Matan Ruak. Imajen/Egas Cristovão

DILI, 18 juñu 2020 (TATOLI)–Primeiru-Ministru, Taur Matan Ruak, informa to’o oras ne’e Prezidente Repúblika (PR), Francisco Guterres “Lú Olo”, seidauk fó sai ajenda serimónia pose ba membru Governu foun na’in 19 ne’ebé aprezenta ona hodi kompleta VIII Governu Konstitusionál.

Notísia Relevante: PM Entrega Ona Lista Kandidatu Membru Governu Na’in-19 ba PR

“Kona-ba ajenda ne’e Prezidente Repúblika mak determina, la’ós Primeiru-Ministru. To’o agora seidauk,” dehan Primeiru-Ministru, Taur Matan Ruak, ba jornalista sira hafoin hala’o enkontru semanál ho Xefe Estadu Lú Olo iha Palásiu Prezidente Nicolau Lobato, Bairru Pité, Dili, kinta ne’e. 

Antes ne’e, jornalista sira konfirma duni ho Xefe Kaza Sivíl Prezidénsia Repúblika, Farancisco Maria de Vasconcelos kona-ba lista ne’ebé  Primeiru-Ministru aprezenta ona, Vasconcelos rekoñese katak lista iha ona gabinete maibé hanesan xefe kaza sivíl seidauk bele ko’alia ba públiku, tanba Prezidente Repúblika seidauk dekreta.

“Lista iha ona gabinete maibé ha’u seidauk bele ko’alia tanba Prezidente Repúblika seidauk dekreta. Bainhira Prezidente Repúblika dekreta ona mak ha’u bele ko’alia,” Xefe Kaza Sivíl rejeita atu fó sai lista, bainhira jornalista sira husu tanba Xefe Esatdu seidauk dekreta.

Entretantu, Prezidente Repúblika Francisco Guterres Lú Olo,  fó ona pose ba membru Governu foun VIII  Governu Konstitusionál hamutuk na’in-ualu iha loron 29 maiu 2020 liu ba ne’e.

Ministru sira ne’ebé simu pose mak hanesan, Vise Primeira-Ministra Armanda Berta dos Santos, Ministru ba Prezidénsia Konsellu Ministru Fidelis Manuel Leite Magalhāes, Ministru ba Assuntu Parlamentares no Komunikasaun Sosiál, Francisco Martins da Costa Perreira Jerónimo, Ministru Finansas Fernando Hanjam, Ministru Administrasaun Estatál Miguel Pereira de Carvalho, Ministra Saúde Odete Maria Freitas Belo, Ministru ba Assuntu Kombatentes Libertasaun Nasionál Júlio Sarmento da Costa ‘Meta Mali’, Ministru Agrikultura no Peskas Pedro dos Reis.

Iha 25 maiu, Prezidente Repúblika promulga Lei Orgániku foun VIII Governu Konstitusionál. Iha Lei Orgániku foun, Primeiru Ministru sei koadjuva husi Vise Primeiru Ministru na’in-rua. Kada Vise  Primeiru Ministru ida sei akumula funsaun Ministru Planu no  Ordenamentu no Ministru Solidariedade Sosiál no Inkluzasaun.

Ministru sira ne’ebé sei integra ba VIII Governu Konstitusionál: Ministru da Prezidénsia Konsellu Ministru, Ministru Koordenadór ba Assuntu Ekonómiku, Ministru ba Assuntu Parlamentar no Komunikasaun Sosial, Ministru Finansas, Ministru Negósiu Estranjeiru no Kooperasaun, Ministru Justisa, Ministru da Administrasaun Estatal, Ministru Saúde, Ministru Edukasaun Juventude no Desportu, Ministru Ensinu Superiór, Siénsia no Kultura, Ministru Solidariedade Sosiál no Inkluzasaun, Ministru ba Assuntus Kombatentes Libertasaun Nasionál, Ministru Planu no Ordenamentu, Ministru Obras Públikas, Ministru  ba Transportes no Komunikasaun, Ministru Turizmu, Komérsiu no Indústria, Ministru Agrikultura no Peskas, Ministru Defeza, Ministru Interiór, Ministru Petróleu no Minerais.

Ministru sira sei koajuva hosi Vise-Ministru Negósius Estranjeiru no Kooperasaun, Vise-Ministru  Justisa, Vise-Ministru Estatál, Vise-Ministru ba Kuidadu Saúde Primária, Vise-Ministru ba Dezenvolvimentu Estratéjiku Saúde, Vise-Ministru Edukasaun, Juventude no Desportu,  Vise-Ministru Solidariedade Sosiál, Vise-Ministru Obras Públikas, Vise-Ministru ba Turizmu Komunitária no Kulturál, Vise-Ministru Komérsiu no Indústria, Vise-Ministru Interiór,  Sekretáriu Estadu Kooperativa, Sekretáriu Estadu ba Ambiente, Sekretáriu Estadu ba Komunikasaun Sosiál, Sekretáriu Estadu ba Teras no Propriedades, Sekretáriu Estadu ba Juventude no Desportu, Sekretáriu Estadu Arte no Kultura, Sekretáriu Estadu ba Assuntus Kombatentes  Libertasaun Nasionál, Sekretáriu Estadu ba Peskas, Sekretáriu Estadu ba Protesaun Sivíl no Sekretáriu Estadu ba Igualdade no Inkluzaun.

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here