Osan Dolar Amerikanu. Imajen/Espesiál

DILI, 18 juñu 2020 (TATOLI)-Ministériu Finansa iha kuarta ne’e transfere ona orsamentu subsídiu ho montante $ 1.343.100 ba Banku Sentrál hodi kontinua haruka ba estudante Timoroan naun bolseiru 2.351 iha nasaun 10 iha rai-liur.

Vise Koordenadór Sekretariadu Tékniku Interinu COVID-19, Ernesto da Conceição Silva, hateten MF halo tranferénsia orsamentu ne’e ba Banku Sentrál  Timor-Leste depois sei kontinua transfere ba konta bankaria Embaixada no adidu edukasaun Timor-Leste nian idaidak iha  nasaun 10 ne’e.

“Osan subsídiu hodi halo pagamentu ba ita-nia estudante naun bolseiro iha nasaun 10 ne’e haruka tiha ona ba banku central horiseihik iha tuku 15:23 Oras Timor-Leste,” dehan Nia ba TATOLI, iha Edifísiu Ministériu Finansa Ai-Tarak-Laran Dili, ohin.

Notísia Relevante:Governu Aprova Millaun $ 2 Hodi fó Subsidiu ba Estudante

Nia esplika, hafoin Embaixada ho Adidu Edukasaun idaidak maka sei halo pagamentu ba estudante sira ne’e.

Estudante Timoroan la’ós bolseiru 2.351 daudaun ne’e estuda iha Estadus Unidus Amérika, Portugal, Brazil, Vietname, Malázia, Filipina, Thailandia, Índia, Austrália no Indonézia.

Notísia Relevante:Subsídiu Ba Estudante Naun Bolseiru Iha Rai-Li’ur Depende ba Kustu Vida Kada Nasaun

Governu aprova kustu ba estudante Timoroan iha rai-liur ho montante diferensia.

Iha EUA estudante Timoroan hamutuk na’in 12, kada estudante sei simu $ 3.000 tanba kada fulan simu $ 1000x3x12= $36.000.

Nasaun Filipina, iha estudante Timoroan 205 kada fulan sei estudante ida simu $ 150x3x205= $ 92.250.

Brazil iha estudante na’in 34, kada fulan estudante ida simu $ 150x3x34=$15.300. Índia iha estudante na’in ida kada fulan simu $ 100×3=$ 300.

Estudante na’in ualu maka estuda iha Austrália, kada fulan estudante ida simu 500x3x8=$ 12.000.Thailandia iha estudante na’in neen kada fulan estudante ida simu 150x3x6=$ 2.700.

Portugal iha estudante na’in 461 kada fulan estudante ida simu 500x3x461=$691.000. Vietname iha estudante Timoroan hamutuk ema na’in 40 kada fulan estudante ida simu 150x3x40=$ 18.000.

Malázia iha na’in sia kada estudante ida simu $ 150x3x9= $ 4.050.

Iha Indonézia hahú husi Jakarta iha estudante na’in 1.121 ho totál osan $ 336.300, Bali iha estudante na’in 226 totál osan $ 67.800, Atambua na’in 33 totál osan $ 9.900, no kupang na’in 195 totaál osan $ 58.500.

Governu konta en jerál ba kada estudante ne’ebé maka estuda iha Indonézia ho valór $ 100×3=$ 300.

Jornalista : Tomé Amado

Editór        : Agapito dos Santos

1 KOMENTÁRIU

  1. Subsidio nb transfer ba indonesia ne la temi estudante hirak nb estuda iha Semarang no Kediri krk sira laos estudante Timor oan g oinsa, obrigado

HAKEREK NO HATÁN

Please enter your comment!
Please enter your name here