Primeiru-Ministru, Taur Matan Ruak. Imajen/Egas Cristovão

DILI, 18 juñu 2020 (TATOLI)–Primeiru Ministru (PM), Taur Matan Ruak, hateten oras ne’e daudaun Governu prosesa hela atu haruka fila sidadaun estranjeiru na’in-13, kompostu hosi Sidadaun Vietname na’in 11 no sidadaun Indonézia na’in rua (2) ne’ebé tama ho ró privadu iha illa Jaco, Munisipiu Lautém.

Notísia Relevante: Migrasaun Hahú Koordena Embaixada Atu Deporta Sidadaun Estranjeiru Na’in-13

Prosesu repatriasaun ne’e, Primeiru Ministru (PM), Taur Matan Ruak, atualiza ba Prezidente Repúblika (PR), Francisco Guterres Lú Olo, durante enkontru semanál iha Palásiu Prezidente Nicolau obato, Bairru Pité, Dili.

“Enkontru semanál ho Prezidente Repúblika, informa kona-ba atividade Governu nian. Ko’alia mós kona-ba situasaun iha rai laran hotu-hotu di’ak, eseptu sidadaun hosi Vietname ne’ebé mak ita kaptura hamutuk na’in 11 no Indonézio na’in rua (2). Daudaun ne’e ita trata hela no ita haree hela oinsá mak ita haruka sira fila-fali ba sira-nia rain,” PM Taur hateten ba jornalista sira, hafoin hala’o enkontru ho PR, kinta ne’e.

Antes ne’e, Portavoz Sentru Integradu Jestaun Kriza (SIJK) doutór Rui Maria de Araújo  hateten, sidadaun estranjeiru na’in-13 ne’ebé tama ho ró privadu iha illa Jaco, iha loron 12 fulan Juñu 2020, livre hosi Coronavirus (COVID-19), hafoin submete ba teste laboratóriu hosi Sentru Integradu Jestaun Krize (SIJK).

Tuir informasaun hosi SIJK katak, sidadaun hirak ne’e halo viajen hosi sidade Kendari, Provínsia Sulawesi Tengara, Indonézia no tama iha Illa Jaco ho sira-nia ró rasik, tanba presiza ajuda kombustivel hodi bele kontinua sira-nia viajen iha tasi laran.

Maski nune’e, sidadaun hirak ne’e labele liu, tanba ró avaria, nune’e autoridade Munisípiu Lautem hamutuk ho Unidade Resposta Rápida Sala Situasaun SIJK transfere kedas hodi submete ba kuarentena iha Dili.

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here