Imajen/Osória Marques.

BATUGADE, 18 juñu 2020 (TATOLI)–Governu liuhosi Centro Integrado Gestão Crize (CIGC), ohin, entrega ekipamentu protesaun pesoál ba Unidade Polisia Fronteira (UPF) iha fronteira Batugade, Munisípiu Bobonaro.

“Ohin ita mai entrega ekipamentu protesaun pesoál ba ita-nia Unidade Polisia Fronteira, forsa armada no mós ba sira ne’ebé servisu iha fronteira nian hodi fasilita sira hodi hala’o sira-nia servisu iha fronteira ne’e,” Segundu Komandante Operasionál Sala Situasaun Centro Integrado Gestão Crize (CIGC), Brigadeiru Jenerál João Miranda ‘Aluk’, ba jornalista sira iha fronteira Batugade, Munisípiu Bobonaro, kinta ne’e.

Imajen/Osória Marques.

Brigadeiru Jenerál Aluk hatutan, ekipamentu protesaun pesoál mak hanesan máskara, luvas no seluk tan ne’e hetan apoiu hosi parseiru Repúblika Populár China no Estadu Unido América. 

Segundu komadante CIGC ne’e hateten, esforsu nafatin atu oinsá mak bele evita situasaun hirak ne’e liuliu situasaun Estadu Emerjénsia ba COVID-19 ne’ebé mak ema hotu preokupa no oinsá mak bele haforsa esforsu nune’e para evita.

“Ita hotu hatene katak ita-nia fronteira ne’e luan liu. Propriu estensaun hatudu mai ita katak ita-nia Polisia Nasionál atu koloka hotu ba fronteira mós difisil. La signifika ita atu husik ka tolera,” nia dehan. 

Tuir nia, polítiku na’in sira iha Nasionál tenke preokupa ho responsabilidade ba forsa armada no polisia sira iha fronteira ne’e. Tanba, nia dehan, iha terrenu haree hosi estensaun Munisípiu Suai to’o iha Batugade ne’e la’ós buat ida ki’ik-oan.  

Jornalista :Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here