Tribunal Distritál Dili.

DILI, 18 juñu 2020 (TATOLI) – Tribunál Distritál Dili (TDD), ohin, hala’o julgamentu ba arguidu JCLS nu’udar funsionáriu públiku ne’ebé asume mós kargu xefia tanba deskonfia komete kazu krime pekulatu ba uzu.

Tuir akuzasaun ne’ebé arrola husi Ministériu públiku (MP) katak, iha loron 14 juñu 2019, tuku 15:00 Otl, ekipa polísia halo operasaun iha Tasi Tolu Dili, polísia hapara karreta ho modelu Toyota ho plat G bainhira arguidu JCLS ho nia oan inisiál JMSL hamutuk iha karreta laran, no arguidu JCLS entrega karreta refere ba nia oan JMSL mak kondús atu ba Tibar, Liquiça, maibé iha loron ferias no la iha autorizasaun husi ministériu relevante.

Operasaun ne’e mós identifika arguidu JMSL laiha karta kondusaun. Arguidu JCLS no JMSL nu’udar aman no oan, mezmu arguidu JCLS hatene momoos katak karreta estadu atu fasilita nia hodi ba halo servisu ministériu ninian, maibé fó karreta ba nia oan iha tempu ferias.

Arguidu JCLS aproveita sasán Estadu ne’e ba nia oan mane hodi uza karreta ne’e hanesan karreta privadu hodi halo nia atividade privadu.

Ho aktu ne’e MP promove arguidu JCLS ho krime pekulatu ba uzu ne’ebé previstu iha artigu 296 husi kódigu penal Timor-Leste, ne’ebé hateten funsionáriu ne’ebé uza ka husik ema-seluk uza ba fim ne’ebé la tama iha nia destinu veíkulu ka movel seluk ho valor signifikadu, ne’ebé tama iha nia liman ka nia bele kaer tanba nia funsaun atu hetan ba nia ka ba ema-seluk benefísiu ilejítimu ka hamosu prejuizu ba ema ruma, sei hetan pena prizaun to’o tinan-rua (2), kuandu buat sira ne’e tama iha nia liman ka nia bele kaer tanba nia funsaun.

MP mós promove arguidu JMSL ho krime kondusaun sem karta kondusaun ne’ebé previstu iha artigu 207 husi kódigu penal Timor-Leste, ne’ebé hatete ema ne’ebé uza veíkulu motorizada maske laiha lisensa ne’ebé lei ezije sei hetan pena prizaun to’o tinan-rua (2) ka multa.

Hatán ba akuzasaun sira ne’e arguidu sira konfesa impasialmente ba Tribunál katak loos duni iha momentu ne’e katak arguidu JCLS fó duni karreta Estadu ba nia oan mane atu ba foti hardisk iha Tibar iha loron sesta-feira, loron servisu nian, la’ós feriadu.

Hafoin, Tribunál rona tiha deklarasaun husi parte arguidu, Tribunál submete kedas ba alegasaun finál.

Iha alegasaun finál Ministériu Públiku husu ba Tribunál atu aplika pena suspensaun ba arguidu na’in-rua ho krime-rua ho pena tinan-rua fulan-neen (6) prizaun.

MP mós husu Tribunál atu komunika ba parte Polísia Unidade Tránzitu atu arguidu sira la bele lori transporte públiku bainhira seidauk iha karta kondusaun.

Defeza Nelson Borges ne’ebé fó asisténsia legal ba arguidu sira solisita ba Tribunál atu absolve arguidu sira husi krime pekulatu ho kondusaun sein karta. Tanba arguidu sira konfesa integralmente no onestu ba Tribunál.

Tribunal rona tiha husi MP no defeza, adia hikas julgamentu ne’e ba fali loron 26 juñu 2020, iha tuku 2:30 Otl, hodi rona desizaun final.

Audiénsia julgamentu ne’e prezide husi juis singular Zulmira Auxiliadóra, Ministériu Públiku reprezenta husi Prokuradora Lidia Soares, arguidu sira asisténsia legal husi Defensór Públiku Nelson Borges.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here