Imajen Espesiál.

DILI, 18 juñu 2020 (TATOLI)—Bankada Congresso Nacional da Reconstrução de Timor (CNRT) kondena maka’as aktu diskriminasaun hosi Deputada KHUNTO, Olinda Guterres, iha Parlamentu Nasionál.

“Bankada CNRT kondena maka’as aktu diskriminasaun ho personajen “rasista” hosi Deputada KHUNTO hasoru CNRT,”  Reprezentanta Bankada CNRT, Deputada Maria Terezinha Viegas, informa liuhosi Konferénsia Imprensa iha sala Bankada CNRT, iha Parlamentu Nasionál, kinta ne’e.

Kazu ne’e akontese iha loron kuarta-feira (17/6/2020) Bankada KHUNTO liuhusi Xefe Bankada, Deputada Olinda Guterres, halo deklarasaun iha plenária Uma Fukun Parlamentu Nasionál hasoru Deputada Maria Fernanda Lay.

Bankada CNRT Konsidera deklarasaun Deputada Olinda Guterres hasai liafuan “xina pirata” ne’ebé nakonu ho intensaun atu diskrimina Deputada CNRT hafoin halo intervensaun ho Lian Portugés iha prosesu audiénsia kona-ba Levantamentu Estraordináriu Fundu Petrolíferu.

Relasaun ho aktu diskriminasaun hasoru Deputada Maria Fernanda Lay, Bankada CNRT hateten ba povu tomak katak:

  1. Deputada Maria Fernanda Lay nu’udar sidadania orijinária timorense tuir artigu 3, Konstituisaun-Repúblika, nune’e, nia iha direitu tomak hanesan ho sidadaun timoroan sira seluk iha ita-nia rai doben Timor-Leste.

“Se KHUNTO iha korajen hasai liafuan rasismu “xina pirata” hasoru Deputada CNRT, Maria Fernanda Lay, ami hakarak husu sá motivu mak enkoraja deputada Olinda Guterres hodi ofende ho insultu ne’ebé asalta estatutu sidadania Deputada Maria Fernanda Lay hanesan timoroan,” Deputada Maria Terezinha Viegas hateten.

  1. Konstituisaun-Repúblika, artigu 13 (1) hateten momoos katak, Repúblika Demokrátika Timór-Leste nia lian ofisiál maka Tetun no Portugés. Konstituisaun la bandu ema atu ko’alia Lian Portugés, maibé deputada Olinda Guterres uza oportunidade ne’e hodi halo ‘má-trata’ hasoru Deputada Maria Fernanda Lay. Ne’e insultu bo’ot ba povu tomak, liuliu ba Partidu CNRT.
  2. Iha artigu 16 (2) Konstituisaun-Repúblika bandu sidadaun hotu-hotu atu labele halo diskriminasaun ba ema ida tanba nia kulit, nia rasa, nia estadu sivíl, nia seksu, orijen étniku, nia lian, pozisaun sosiál eh ekonómiku, hanoin polítiku ka ideolojia, relijiaun, instrusaun eh nia kondisaun fízika eh mentál. Maibé lamentável tebes tanba Deputada KHUNTO Olinda Guterres hanesan reprezenta Povu hatudu momoos lori hela perigu no halo ameasa ba ita-nia nasaun ho nia prinsípiu no norma bazeadu pluralizmu nian.
  3. Deputada KHUNTO Olinda Guterres haluhan tiha ona katak, dalabarak iha plenária, nia halo deklarasaun no intervensaun polítika Bankada KHUNTO nian ho Lian Portugés. Laiha ema ruma bandu nia. Maibé ho hahalok diskriminativu ida-ne’e hatudu katak, deputada Olinda Guterres laós ona reprezenta Povu maibé aproveita kadeira deputada nian hodi promove deit odiu vingansa polítika no promove aktu diskriminativu ba iha sosiedade nia leet.
  4. Deputada KHUNTO Olinda Guterres hahú promove rasismu ne’ebé mak ohin loron mundu hotu-hotu hakribit, no sira agora esforsu makaas atu rezolve konflitu iha sira-nia rain rasik, maibé ohin loron, Deputada KHUNTO ne’e alende halo violasaun grave hasoru ita-nia Konstituisaun-da-Repúblika, inkomprimentu mós Deklarasaun Universál Direitu Umanu ne’ebé Timor-Leste ratifika tiha ona.

“Tanba-ne’e, Bankada CNRT kondena makaas hahalok diskriminativu, la edukativu ne’ebé deputada KHUNTO halo hasoru Deputada CNRT iha Parlamentu Nasionál, liafuan no insultu ho personajen rasista tenke hapara kedas hahú agora. Timor-Leste tenke livre hosi hahalok aat (diskriminasaun hasoru umanu), insultu no laiha fatin atu promove rasismu iha ita-nia rai doben Timor-Leste ne’ebé mak harii ho sakrifísiu ema ua’in ba Ukun Rasik Aan ida-ne’e,” dehan Reprezentante Bankada CNRT, ne’ebé akompaña husi Xefe Bankada, Duarte Nunes no membru deputadu CNRT tomak.

Entretantu Deputada CNRT, Maria Fernando Lay espera Komisaun G (Edukasaun, Juventude, Kultura no Sidadania) iha Parlamentu Nasionál tenke haree étika sira-ne’ebé hatudu Deputada Olinda Guterres hatudu.

“Ha’u espera atuál Prezidente Parlamentu Nasionál tenke foti medida tanba la’ós primeira vez Deputada Olinda ataka ema seluk iha plenária, agora ne’e husik ba públiku mak julga loos ka lae aktu sira-ne’e,” hateten Deputada Maria Fernanda Lay.

Hatán ba kestaun ne’e, Deputada KHUNTO, Olinda Guterres, hateten kazu ne’e akontese tanba loloos debate osan povu nian tenke uza lian Tetum nune’e ema hotu bele komprende.

“Agora señora Deputada Maria Fernanda Lay hosi sorin hateten kuandu la hatene Portugés, iha parlamentu ne’e loke hela kursu Portugés nusá o la estuda. Ha’u ho idade 69 anos ba estuda fali Portugés iha oras ida hanesan ne’e, ne’e mak halo ha’u hirus hodi ha’u hatete “xina pirata” ne’e mak nia haksoit mai ami “rakut-malu” ne’e”, Deputada Olinda Guterres hateten.

Maski nune’e, Deputada Olinda Guterres lakohi husu “deskulpa” ba aktu ne’e tanba iha vida polítika halo deklarasaun hanesan ne’e normál.

Jornalista : Evaristo Soares Martins

Editór      :  Cancio Ximenes

HAKEREK NO HATÁN

Please enter your comment!
Please enter your name here