Aviaun ZEESM. Imajen/twinotterarchive

DILI 18 juñu 2020 (TATOLI) Prezidente Konsellu Administrasaun Ajénsia Nasionál Aviasaun Timor-Leste, Empreza Públika (ANATL,EP), Romualdo da Silva, informa durante ne’e aviaun Zona Espesial Ekonómia Sosiál Mekadu (ZEESM) la halo operasaun tanba iha situasaun Estadu Emerjénsia kauza husi surtu COVID-19.

“Aviaun ne’e para de’it dezde fulan-marsu liubá tanba situasaun Estadu Emerjénsia to’o agora seidauk bele halo nian operasaun”, nia dehan ba Agência Tatoli via telefónika, kinta ne’e.

Iha sorin seluk, Prezidente Autoridade Aviasaun Sivíl Timor-Leste (AACTL, sigla portugés), Ana Rosália Ximensa Varela, fundamenta aviaun ZEESM ne’ebé durante ne’e halo operasaun Dili-Oé-cusse no Dili-Same ne’e la’o normál, maibé tanba Estadu Emerjénsia maka aviaun ne’e la halo operasasaun.

“Ita tenke kumpre regra. Aviaun ne’e la halo ona operasaun maibé karik situasaun normál bele la’o normál,” nia akresenta.

Folin billete aviaun ZEESM husi Dili bá Oé-cusse $25, enkuantu Dili-Suai ba klase VIP $30 no ba klase ekonomia $25.

Governu liuhosi ANATL iha 4 abríl deside suspende provizóriu operasaun komersiál internasionál husi nasaun li’ur, maibé la mensiona kona-ba voo komersiál doméstiku.

Jornalista: Natalino Costa        

Editora: Julia Chatarina

HAKEREK NO HATÁN

Please enter your comment!
Please enter your name here