Uniaun Europeia Asina Kontratu kona-ba prevensaun surtu COVID-19 iha Timor-Leste.Imajen/Felicidade Ximenes

DILI, 17 juñu 2020 (TATOLI)-Uniaun Europeia kuarta ne’e, asina kontratu ida ho CARE Internasionál kona-ba subvensaun foun ho valor millaun $ 1.3 ba prevensaun surtu COVID-19 iha Timor-Leste.

Projetu ne’e sei implementa husi Organizasaun Internasionál lima maka Oxfam, Catholic Relief Servise (CRS), Plan Internasionál, no World vision servisu hamutuk ho ONG Lokál The Oé-cusse Post, Luta Ba Futuru, Knua Haberan Komunidade, Pradet, Bifano, Maneo, kdalak sulimutuk Institute, Raes Tadomi Timoroan, no Caritas Baucau.

Organizasaun Internasionál lima ho ninia parseiru husi ONG lokál sei ezekuta projetu UE ne’e hodi distribui apoiu ba populasaun iha  Dili, Baucau, Viqueque, Aileu, Covalima, Ermera, Liquiça no Rejiaun Administrativa Espesiál Oé-Cusse Ambeno (RAEOA).

Embaixadór Uniaun Europeia iha Timor-Leste, Andrew Jacobs, hateten apoiu UE nian ne’e atu responde nesesidade populasaun sira ne’ebé tama iha kategoria vulneravel liu durante implementasaun Estadu Emerjénsia relasaun ho surtu Coronavirus.

”Ami husi Uniaun Europeia asina kontratu ho Care Internasionál kona-ba subvensaun foun ida ho valor  $ 1.3 millaun,” dehan Andrew Jacobs, durante ninia diskursu iha Palasiu Sinzas Caicoli Dili, ohin.

Apoiu UE en jerál ba prevensaun COVID-19 iha Timor-Leste ho orsamentu  mazumenus millaun $ 3.5.

Tuir Jacobs katak apoiu ne’e sei refere liu ba sidadaun ho kondisaun ekonomia vulneravel liu hanesan feto faluk sira, ferik ho katuas, defisiénsia no seluk tan.

“Programa responde ba COVID-19 iha Timor-Leste ema hamutuk 32.956 sei sai benifisiáriu direitu inklui 10.000 benifisiáriu mak sei simu ekipamentu protesaun no benifisiariu hirak ne’e inklui feto ne’ebé mak sai hanesan xefi família, Inan isin-rua, inan ne’ebé sei fó susu bebé, no família ne’ebé ho ema difisiénsia,”tenik tan.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here