Primeiru-Ministru, Taur Matan Ruak prezide reuniaun Konsellu Ministru iha Palásiu Governu, kuarta (17/06). Imajen Tatoli/Egas Cristovão

DILI, 17 juñu 2020 (TATOLI) – Konsellu Ministru (KM) aprova Projetu Rezolusaun Governu ne’ebé aprezenta hosi Ministru Justisa, Manuel Cárceres da Costa, kona-ba nomeasaun ba Tiago Amaral Sarmento nu’udar Vogál Efetivu ba Konsellu Superiór Majiztratura Judisiál.

“Konsellu ne’e nia kna’ar maka jere no hatuur disiplina ba atividade sira iha Majiztratura Judisiál nian no mós nomea, koloka, transfere no promove juíz sira iha Superiór Majiztratura Judisiál ne’ebé kompostu husi vogál na’in-haat ne’ebé nomeadu husi Governu,” relata Ministru ba Prezidénsia Konsellu Ministru, Fidelis Manuel Leite Magalhães liuhosi konferénsia imprensa hafoin reuniaun KM iha Palásiu Governu, kuarta ne’e.

Vogál Efetivu ba Konsellu Superiór Majiztratura Judisiál, Tiago Amaral Sarmento . Imajen/Mídia MJ

Governante ne’e hateten, nomeasaun Tiago Amaral Sarmento Governu hodi troka Cirílio Cristovão.

“Antes ne’e saudozu Cirílio Cristovão mak reprezenta Governu iha konsellu ne’e, maibé nia mate tiha ona no durante ne’e seidauk iha troka mak nia fatin,” nia akresenta.

Seluk ne’ebé funsionál hela maka Carmelita Moniz, atuál deputada maibé hanesan vogál suplente, tanba ne’e maka presiza fali ema ida atu prienxe fali Saudozu Círilo nia fatin.

Funsaun vogál efetivu ba Konsellu Superiór Majiztratura Judisiál ne’e mak halo akonsellamentu, hanesan órgaun ida hodi ajuda Tribunál sira ne’ebé reprezenta de’it Governu iha diskusaun deliberasaun konsellu nian.

Prezidente Konsellu mak Prezidente Tribunál Rekursu, hanesan mós Konsellu Superiór Ministériu Públiku.

Maske nune’e, reprezentante Governu iha Konsellu Superiór Majiztratura Judisiál ne’e labele foti desizaun maibé bele de’it delibera no mandatu tinan lima.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here