Estudante Sekundariu 4 Setembru UNAMET, Dili 16 Junu 2020. Imajen/Antonio Goncalves

DILI,17 juñu 2020 (TATOLI)-Ministra Edukasaun Juventude no Desportu Demisionaria, Dulce de Jesus Soares, hateten Governu seidauk iha data fiksu hodi re-ativa prosesu aprendizajen ba estudante sira iha eskola públiku no privada sira dala ida de’it maibé sei halo fazeadamente iha Territóriu Timor-Leste.

“Ita deside halo abertura fazeadamente tuir realidade eskola sira ne’ebé mak tama ona prosesu preperasaun ho di’ak, kuandu ita deside data fiksu entaun husi  eskola 1.000-resin  iha Timor ne’e mak eskola rua de’it seidauk kompleta item hitu ne’e ita tenki hein, tanba ne’e ita halo abertura ne’e fazeadamente,”katak, Dulce ba TATOLI, iha ESTV Becora, ohin.

Nia dehan eskola privada no públiku balun prienxe ona padraun ba prevensaun COVID-19 hanesan instala ona ekipamentu fase liman, iha máskara, garante ona distansiamentu fizíku no seluk tan tanba ne’e sira bele komesa ona prosesu aprendizajen.

Maibé, ba eskola pre-eskolár to’o ensinu sekundária ne’ebé seidauk kria kondisaun, Governante ne’e husu atu uza osan konsensaun eskolár hodi sosa ona fasilidade para instala iha eskola idaidak nune’e bele re-ativa prosesu aprendizajen ba estudante sira.

“Ita hanoin ona fó biban ba eskola sira hotu liuhusi dirijente eskola idaidak atu jere sira-nia osan, maibé ida ne’e de’it mós tenki hein nafatin Ministériu mak tenki orienta  nafatin ba oin mak laiha preparasaun ita sei fó sansaun dirijente sira,”dehan Governante.

Padraun sira ne’ebé maka Ministériu Saúde rekomenda ba eskola idaidak hodi implementa maka tenki instala tanke bee fase liman kompleta ho sabaun, rai balde no sabaun iha kada sala, garante distansiamentu fiziku, tenki uza máskara, iha lixu fatin, eskola tenki livre no profesór sira tuir ona formasaun online kona-ba prevensaun COVID-19.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here