Komunidade sira kontinua hein iha Sede Suku 30 Agostu Comoro, Tersa 16 Juinu 2020 hodi hein simu subsidiu $200 hosi Governu relasiona ho Estadu Emerjensi durante fulan rua tanba VOVID 19. Imajen/Antonio Goncalves.

DILI, 17 juñu 2020 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto hateten, progressu ezekusaun ba pagamentu subsídiu $200 to’o horikalan 22:00, iha Munisípiu 12 atinje ona ba 72.9%. 

Notísia Relevante: Uma-Kain 217.744 Simu Ona Subsidiu, Reklamasaun Hamutuk 7.435

“Ita-nia progressu ezekusaun ba pagamentu subsídiu $200 iha Munisípiu 12 atinje ona ba pursentu 72.9,” Diretór Jerál MSSI, Rui Manuel Gago Exposto, ba jornlaista sira iha salaun MSSI, Caicoli, Dili, kuarta ne’e.

Nia hatutan, maski iha komplikadu oin-oin iha prosesu pagamentu subsídiu $200 maibé nia dehan nafatin garante sei finaliza tuir kalendáriu pagamentu.

“Ha’u fiar katak ohin ita-nia pesoál pagamentu ho númeru ne’ebé mak aumenta tan ona iha fatin pagamentu nune’e bele aselera prosesu pagamentu ida-ne’e ho susesu, tanba ita-nia estimasaun pagamentu hosi loron sanulu (10) to’o loron sanulu-resin haat ne’e (14),” nia dehan. 

Nia relata, pagamentu subsídiu ba kada uma-kain iha Munisípiu Dili atinje ona 50% maibé Munisípiu seluk atinje ona 75% ba leten.

“Tanba ne’e, ha’u dada tan ona ekipa pagamentu hosi munisípiu seluk ne’ebé mak iha suku balun finaliza ona hodi aumenta ba Munisípiu dili nian, nune’e ita tenke aselera pagamentu iha Munisípiu Dili ne’e,” Diretór ne’e hateten.

Nia dehan, iha prosesu pagamentu ba subsídiu $200 ba benefisiáriu sira iha Munisípiu Dili mak komplikadu liu tanba benefisiáriu barak liu.

“Ha’u hanoin komplikadu liu mak iha Munisípiu Dili tanba prosesu pagamentu ita observa la’o kleur uitoan no kestaun seluk mak númeru benefisiáriu boot liu 64.913 entre Munisípiu sira seluk. Ita-nia pesoál halo pagamentu iha loron dahuluk no daruak iha pesoál ema ida de’it. Maibé agora ita aumenta tan ona pesoál sira hosi munisípiu seluk. Agora mak ita reforsa hodi aselera prosesu pagamentu,” nia dehan.

Iha Munisípiu seluk mós iha komplikadu hotu maibé lahanesan ho Dili tanba Munisípiu sira balun ne’e, iha suku balun ne’ebé hela iha área remotas la besik vila entaun hodi difikulta servisu ekipa pesoál pagamentu.

“Iha prosesu pagamentu ita mós tenke identifika mós ba ema ne’ebé idozu no defisiente no ema ne’ebé moras la’o labele entaun ita-nia ekipa tenke la’o to’o iha benefisiáriu nia uma mak hodi halo pagamentu,” nia esplika.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here