Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio  Paixão Bano. Imajen Tatoli/António Gonçalves

DILI, 17 juñu 2020 (TATOLI)-Prezidente Autoridade Rejiaun Administrativa Espesiál Oé-Cusse Ambeno,  Arsénio Paixão Bano, promete sei fó apoiu ba ekipa liña oin ka frontline Oé-Cusse nian hodi halo prevensaun ba transmisaun moras Coronavirus mai RAEOA.

Nia dehan daudaun ne’e kazu transmisaun COVID-19 iha Provínsia Nusa Tenggara Timur (NTT) Indonézia ninia númeru kontinua aumenta maka’as tanba ne’e sei afeta mós ba Timor-Leste bainhira seguransa iha liña fronteira terrestre entre nasaun rua maka  la halo kontrola ho di’ak liután.

“Aban(kinta-red) ha’u ba RAEOA hodi reforsa nafatin servisu sira ne’e iha RAEOA tanba iha kupang NTT iha kazu aumenta barak no transmisaun lokál ne’e komesa la’o ona iha NTT entaun ita tenki prevene para labele tama mai iha ita-nia ra’in,”dehan Arsénio Bano ba jornalista sira iha Palacio da Sinzas, Caicoli ohin.

Eis Deputadu ne’e  apresia ho servisu liña oin hanesan Médiku, Doutór, Enfermeiru, Polisia Unidade Fronteira no seluk tan ne’ebé maka durante servisu maka’as hodi halo prevensaun ba transmisaun surtu COVID-19 iha Oé-Cusse.

“Seguransa servisu maka’as atu nune’e movimentu ilegál mós labele tama mai iha ita-nia ra’in se karik tama tenki liuhosi prosedimentu kuarentena  ne’ebé mak estabelese iha RAEOA ne’e rasik,”dehan Bano.

Kona-ba rekursu umanu, Prezidente Autoridade ne’e hateten iha rekursu sufisiente tanba iha Doutór, Médiku, Enfermeiru, Parteira no seluk tan ne’ebé maka fó apoiu másimu ba prevensaun moras coronavirus.

Jornalista : Felicdade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here