Ministru Agrikultura no Peska, Pedro Reis. Imajen/Egas Cristovão

DILI, 17 juñu 2020 (TATOLI) – Ministru Agrikultura Peska, Pedro Reis, informa iha semana kotuk bainhira Embaixadór Nova Zelándia ba Timor-Leste, Phillip Hewit hasoru malu ho nia, kompromete sei tulun Ministériu Agrikultura no Peska (MAP) ho fundu hodi hadi’a irrigasaun ne’ebé maka hetan estragu durante inundasaun iha Kosta Súl.

Udan boot iha loron 22 maiu iha parte Kosta Súl no Leste, provoka inundasaun no konsege estraga kanál boot haat hanesan irrigasaun Larisula Manufahi, Karau-ulun, Webaba no Suai Kasa nian inklui irrigasaun ki’ik-oan sira no natar sira.

“Agora ekipa tékniku sira lori ona materiál pezadu bá terrenu tanba ita laiha osan sufisiente atu hadi’a. Semana liubá Embaixadór Nova Zelándia informa atu apoia MAP $600.000 atu  normaliza irrigasaun haat ne’ebé afeta durante dizastre naturál ne’ebé akontese iha Kosta Súl”, dehan Ministru Pedro Reis iha Palásiu Governu, kuarta ne’e.

Notísia Relevante: Inundasaun iha Kosta Súl Estraga Irrigasaun Boot Haat Inklui Natar

Kanál irrigasaun boot iha área Larisula foin mak halo iha tinan kotuk ne’ebé iha poténsia ektare 700, maibé agora kuda hela hare kuaze ektare 400.

Enkuantu irrigasaun Webaba parte Suai Loro nian, natar hamutuk ektare 230 mak mota sobu maibé sei bele salva ho razaun seidauk to’o hare Susu-ben (kabuki) no seidauk tama hare Tasak.

Iha irrigasaun Webaba hare ektare 13 maka hetan estragu totál.

Irrigasaun iha Larisula 01 nian, ne’ebé kuaze metru 15 mak hetan estragu totál, tanba ne’e daudaun bee sei suli hela ba natar kuaze ektare 400

Ministru ne’e dehan, normalizasa irrigasaun ne’e atu tau iha planu orsamentu iha planu 2020, maibé la biban atu ezekuta tanba ho durasaun tempu badak, tanba ne’e sei tau iha planu 2021.

“Orsamentu 2020 ne’e halo de’it sasán ki’ik sira tanba nia tempu ezekusaun ba fulan-tolu nia  laran de’it. Maibé irrigasaun hotu kuaze prioridade atu hadi’a,” nia realsa.

Kona-ba preparasaun orsamentu tinan fiskál 2020 no 2021, Pedro Reis hateten preparasaun halo daudaun hahú husi nível diresaun sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here