Ministru Obra Públika, Salvador Eugênio Soares dos Reis Pires. Imajen/Egas Cristovão

DILI, 17 juñu 2020 (TATOLI) – Ministériu Obra Públika (MOP) hamutuk ho Sekretaria Estadu Terra no Propriedade (SETP) halo koordenasaun ba levatamentu dadus husi abitante afetada ba konstrusaun estrada nasionál dirasaun Manleuana to’o Sarlala, Postu Administrativu Laulara, Munisípiu Aileu.

“MOP no SETP sei forma ekipa integradu interministeriál hodi halo levantamentu dadus ba komunidade afetada iha konstrusaun estrada Manleuana – Sarlala, atu nune’e bele halo indemnizasaun hodi kontinua projetu ne’e to’o ramata,” tenik Ministru Obra Públika, Salvador Eugênio Soares dos Reis Pires, iha Palásiu Governu, kuarta ne’e.

Projetu ne’e prevee ona iha orsamentu 2018, iha fundu infraestrutura, ba reabilitasaun estrada dirasaun Dili-Manleuana-Solorema-Aileu ho kilometru 15, ho totál projetu hamutuk sia no toma konta husi empreza sia.

Enkuantu, rekonstrusaun estrada dirasaun Dili-Beduku-Sarlala-Aileu (Kasnafa-Urtukin), toma konta husi empreza Sun Rice Golden ho totál orsamentu ba obra $3.138.362, hahú husi dezembru 2017 to’o 2021.

Antes ne’e, Diretór Jerál Ministériu Obra Públika, Rui Hernani, informa empreza Sun Rice Golden hein desizaun Tribunál atu kontinua konstrui estrada kuaze metru 200 ne’ebé paradu iha área Mota Beduku, Aldeia Rai-hun, Suku Manleuana, Postu Administrativu Don Aleixo, Munisípiu Dili.

Projetu konstrusaun ne’e ladauk halo tanba konsege iha kazu no rejista ona iha Tribunál Distritál Dili (TDD).

Kompañia timor-oan ida mak hala’o atividade dulas fatuk iha fatin área rekonstrusaun obra.

“Kompañia kontratór hakat liu kuaze metru 200. Tanba problema ne’e mosu iha VI Governu bainhira empreza ida harii dulas fatuk iha ne’ebá maka ami tenta negosia, maibé la konsege tanba kompañia la koopera. Iha VI Governu ami hato’o hikas maibé prosesu ne’e to’o ona iha Tribunál, tanba ne’e ami hein prosesu ramata no hetan desizaun atu kompañia kontinua obra ne’e,” Diretór Rui Hernani haktuir ba Agência Tatoli iha kna’ar fatin.

Daudaun ne’e atividade pedreira paradu no empreza sei hein desizaun Tribunál.

“Tuir loloos Governu tenke halo ona despeza atu empreza bele akapta no hala’o tiha obra ne’e, maibé tanba asuntu ne’e iha ona Tribunál maka ita tenke hein,” nia akresenta.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here