Primeiru-Ministru, Taur Matan Ruak prezide reuniaun Konsellu Ministru iha Palásiu Governu, kuarta (17/06). Imajen Tatoli/Egas Cristovão

DILI, 17 juñu 2020 (TATOLI) – Reuniaun Konsellu Ministru (KM) ordinária iha kuarta ne’e hahú halo diskusaun ba kriasaun Autoridade Marítima Nasionál no defini autoridade ne’e nia kna’ar inklui estrutura koordenasaun.

Asuntu rua ne’e, aprezenta husi Ministru Defeza no Seguransa no Ministru Interiór interinu, Filomeno da Paixão de Jesus, ne’ebé ho vizaun hakarak atu autoridade ne’e sai nu’udar entidade responsável ba koordenasaun atividade sira iha ámbitu nasionál, ne’ebé sei ezekuta husi Komponente Forsa Navál no Diresaun Autoridade Marítima Nasionál iha área jurizdisaun inklui kuadru ba sistema Autoridade Marítima hodi observa instrusaun ne’ebé defini ona husi Ministru tutela.

“Kriasaun Autoridade Marítima Nasionál ne’e ami aprezenta ona ba Konsellu Ministru no Ministériu Transporte no Komunikasaun (MTK) mós aprezenta kona-ba kontrolu ba ró ne’ebé tama, maibé Govenu sei analiza filafali kona-ba kriasaun instituisaun ne’e no sei apresia filafali iha reuniaun tuirmai,” tenik Ministru Filomeno iha Palásiu Governu, hafoin reuniaun ezekutivu.

Tuir nia, aprezentasaun ba autoridade ne’e atu sai sumbriña ba Forsa Navál, MTK, inklui Ministériu Finansa (MF) atu hamutuk hodi halo vijialánsia ba atividade inspesaun, kontrola no rejista ró inklui loke kontainer.

“Bainhira kria ona Autoridade Marítima Nasionál, entidade hotu hanesan FALINTIL-Forsa Defeza Timor-Leste (F-FDTL), Polísia Nasionál Timor-Leste (PNTL), no Alfándega tenke hamutuk atu halo inspesaun ró, ba rejistu ró, loke kontainer, inklui kotrola riku soin tasi laran,” nia subliña.

Autoridade ne’e sei kompostu husi linã ministériál, tanba ne’e presiza halo diskusaun kle’an hafoin estabelese.

Objetivu harii autoridade ne’e atu kontrola rikusoin iha Timór nia iha tasi laran tanba durante ne’e peska ilegál barak halo peska ilegál ba ikan iha tasi Timór nia no sei tau-matan mós ba nesesidade seluk.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here