Primeiru-Ministru, Taur Matan Ruak prezide reuniaun Konsellu Ministru iha Palásiu Governu, kuarta (17/06). Imajen Tatoli/Egas Cristovão

DILI, 17 juñu 2020 (TATOLI) – Governu liuhosi Konsellu Ministru (KM) aprova projetu Dekretu-Lei kona-ba Rejime Jurídiku ba Vijilánsia Epidemolójika no Sanitária.

“Diploma ida-ne’e atu oferese ba autoridade vijilánsia epidemolójika no sanitária sira hodi halo medida adekuadu, nune’e bele halo protesaun no promosaun ba saúde públika iha tempu normál no mós iha tempu emerjénsia, ne’ebé la haree ba prejuízu rejime espesiál iha situasaun esesaun konstitusionál,” relata Ministru Prezidénsia Konsellu Ministru, Fidelis Manuel Leite Magalhães hafoin reuniaun KM, kuarta ne’e.

Governante ne’e subliña, lejizlasaun ne’e ninia objetivu mak atu operasionaliza Lei númeru 10/2004, nune’e bainhira laiha Estadu Emerjénsia Governu iha dalan atubele implementa ho loloos no di’ak ba medida sira ne’ebé mak sei fó protesaun ba sidadaun sira kontra COVID-19.

Iha parte ida mós bele loke dalan ba medida sira hanesan kuarentena no loke dalan ba teste sira, atu nune’e laiha ona Estadu Emerjénsia, Ministériu Saúde iha dalan atu implementa medida sira ne’ebé mak importante tebes hodi proteje sidadaun hosi surtu globál no moras sira seluk.

Nune’e, projetu Dekretu-Lei ne’e hakarak atu garante mekanizmu no fó protesaun ba saúde públika atu evita no neutraliza risku diseminasaun no kaer-hada’et ba populasaun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here