Governadór BCTL, Abraão de Vasconcelos. Imajen Tatoli/Antonio Goncalves

DILI, 17 juñu 2020 (TATOLI)—Banku Sentrál Timor-Leste (BCTL-sigla portugés) fó-sai katak ekonomia Timor-Leste nian monu ka negativu 6% tanba kauza hosi gastu ba orsamentu Estadu no impaktu globál COVID-19.

Notísia Relevante: Maske Fundu Minarai Monu Biliaun $1.8, Governu Mantein Investimentu Asaun

Governadór BCTL, Abrão de Vasconcelos, ohin, halo diskrisaun iha ámbitu audisaun públika entre Governu ho Komisaun C (Finansa Públika) kona-ba situasaun makro ekonómiku Timor-Leste ninian no investimentu fundu petróleu.

BNCTL fó-sai kestaun ne’e tanba asume papél hanesan jestór operasionál fundu petróleu. Governadór BCTL ne’e hateten impaktu ba ekonomia Timor-Leste iha buat rua, dahuluk naun esténsia ba orsamentu estadu no daruak impaktu hosi COVID-19.

“Tuir estudu ne’ebé ami halo ita-nia ekonomia monu 6%. Razaun ita-nia ekonomia monu tanba fatór prinsipál rua ne’e (impaktu husi orsamentu estadu no COVID-19) maibé ida-ne’e tanba medida sira-ne’ebé mak introdús tiha ona no ida-ne’ebé mak ita introdús atividade ekonómiku ne’ebé mak la fila-fali ba hanesan baibain. Ida-ne’e kauza demanda agregada ne’e monu kuaze negativu 11%, ida-ne’e inklui iha laran ne’e demanda agregada ba setór públiku ne’e monu boot liu negativu 14%,”  Governadór BCTL, Abrão de Vasconcelos, ko’alia iha plenária, Parlamentu Nasionál, tersa ne’e.

Nune’e mós, nia esplika, setór doméstika monu 7%, ne’e kálkula hamutuk hotu ho exportasaun no menus importasaun ne’ebé mak monu kuaze negativu 18% mak hetan iha Timor-Leste nia kresimentu ekonómiku ba naun-petrolíferu negativu 6%.

Governadór ne’e hateten, kestaun ne’e la dook hosi projesaun sira-ne’ebé mak instituisaun relevante sira halo ein-partikulár Banku Mundiál, Banku Dezenvolvimentu Áziatiku no iha fulan-abríl Fundu Monetáriu Internasionál (FMI) halo projesaun kona-ba ekonomia Timor-Leste nian iha 2020.

Governadór BCTL bolu atensaun ba deputadu sira hotu ne’e iha inserteza iha projesaun ida-ne’e tanba Timor-Leste la hatene informasasun iha oin-mai ne’e saida mak atu akontese, liuliu iha parte saúde públiku nian relasaun ho surtu COVID-19.

Tanba haree ba esperiénsia nasaun sira hanesan Índia, Pakistaun no Xina oras ne’e hasoru no nasaun hirak ne’e hahú segundu faze lockdown ninian no inserteza sira hanesan ne’e difikulta Timor-Leste nia projesaun maibé Timor-Leste tenke iha ideia uitoan nia impaktu ba ekonomia rai-laran ne’e halo nusá.

Iha parte inflasaun nian, Banku Sentrál la observa iha presaun maske to’o iha fim 2020 maibé hakarak bolu atensaun, karik posibilidade iha supply ne’e bele iha pontu risku ba inflasaun iha rai-laran.

“Ita la observa hanesan presaun demaziada iha ita-nia ekonomia, liuliu iha fulan tolu ikus tanba ne’e dadus estatístika ne’ebé públika hosi Diresaun Jerál Estatístika ninian la hatudu aumentu iha taxa inflasaun iha Timor-Leste,” nia dehan. 

Governadór BCTL ne’e bolu atensaun ba Governu katak, situasaun ida-ne’e atu piór liu ka atu di’akliu depende modelu intervensaun ne’ebé mak Governu atu halo ka estadu Timor-Leste atu halo tanba haree nível atividade ekonómiku foin mak survei ho eskala boot kona-ba atividade negósiu hotu iha Timor-Leste.

Tanba ne’e mak seidauk iha dadus maibé karik aban bainrua iha, bele ajuda deputadu sira intende didi’ak situasaun reál hanesan saida loos.

Iha parte jesaun fundu petróleu iha nível operasionál laiha risku signifikante ne’ebé mak BCTL enfrenta maibé iha merkadu finanseira mundiál Timor-Leste iha inserteza boot tebes.

“Agora ita ko’alia númeru ida, karik fulan-oin númeru seluk. Hanesan uluk iha audénsia ha’u dehan ita-nia valór fundu ne’e queda (monu) biliaun $1.8, liu tiha semana tiha semana ida tún ba millaun $800,” nia esplika. 

Ikus liu, Governadór BNCTL ne’e bolu atensaun ba Governu atu halo intervensaun ho rápida nune’e situasaun hirak labele sai piór liután.

Jornalista : Evaristo Soares Martins

Editór      :  Cancio Ximenes

HAKEREK NO HATÁN

Please enter your comment!
Please enter your name here