Enkontru entre PA RAEOA-ZEESMS, TL, Arsénio Paixão Bano no eis PA Marí Alkatiri, akompaña husi Adjuntu Sekretáriu Jerál Fretilín, iha rezidénsia Farol, kuarta (17/07). Imajen/Gabinete eis titulár

DILI, 17 juñu 2020 (TATOLI) – Prezidente Autoridade (PA) Espesiál Oé-cusse Ambeno (RAEOA) no Zona Administrativa Espesiál Oé-cusse Ambeno, Timor-Leste  (ZEESM), Arsénio Paixão Bano hasoru malu ho eis PA, Marí Alkatiri, nu’udar fundadór no konseptór ba zona ne’e hodi ko’alia kona-ba konseitu dezenvolvimentu no investimentu iha rai Oé-cusse.

Tuir Arsénio, investimentu tenke estratéjiku nune’e iha futuru bele hetan fali retornu.

“Saida maka ita investe iha Oé-cusse, aban bain-rua tenke hetan fali retornu hanesan ezemplu Aeroportu Internasionál Rota do Sândalo, otél, no infraestrutura sira ne’ebé halo sidade sai furak ne’e tenke hatama fali osan no foku  ba ekonómia baze no família ida-idak atu hetan netik rendimentu,” tenik PA RAEOA iha rezidénsia Farol, kuarta ne’e.

Eis Sekretáriu Rejionál ne’e dehan, nia parte presiza nafatin apoiu husi Alkatiri hodi lori Oé-cusse la’o ba oin.

“Ha’u hanesan Prezidente RAEOA foun, nafatin sei  kontinua obra ne’ebé Doutór Marí antes halo. Ha’u sei husu apoiu nafatin nune’e Oé-cusse ninia investimentu ne’e iha valór ekonomia hotu no labele iha sosiál de’it”, nia subliña.

Iha fatin hanesan, Alkatiri prontu atu apoiu dezenvolvimentu iha rai enklave Oé-cusse, atu loke dalan ba kontinuasaun prosesu ne’ebé antes ne’e hahú ona.

Iha enkontru ohin ko’alia mós kona-ba Ró Haksolok ne’ebé to’o oras ne’e seidauk to’o Timor-Leste.

“Kona-ba Ró Haksolok ohin ami ko’alia hotu, ho ajuda husi Governu Sentrál rezolve kestaun ne’e. Tanba ne’e ami sei halo esforsu  bo’ot hodi nune’e ró ne’e bele to’o mai,” nia akresenta.

Proposta orsamentu 2020  ba RAEOA antes ne’e propoin ho montante millaun $127.206, ne’ebé fahe ba kategoria saláriu no vensimentu hamutuk millaun $8.819, bens no servisu millaun $14.484, transferénsia públika millaun $2.783, kapitál menór rihun $520, no kapitál dezenvolvimentu millaun $100.599.

Iha tinan fiskál 2019, Governu Sentrál aloka orsamentu millaun $76 ba konta Autoridade RAEOA-ZEESM, maibé transferénsia tama tarde tanba orsamentu tinan 2018 sei iha konta Autoridade hamutuk millaun $38.

Dezde 2015 to’o 2019 orsamentu ne’ebé aloka ba RAEOA hamutuk millaun $608 resin no iha tinan haat nia laran konsege rekolla ona reseita millaun $32.

Investimentu iha Oé-cusse ne’ebé boot liu maka Aeroportu Rota do Sândalo ho ninia kustu obra pur volta millaun $120, ne’ebé konstrui hosi empreza Wijaya Karya, Tbk (WIKA) husi Indonézia.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here