Kay Rala Xanana Gusmão, inaugura Sentru Turizmu komunitaria ho baze tradisionál iha Aldeia Rai-Mutia, Suku Baboe-Kraik, Postu Administrativu Atsabe, Munisípiu Ermera, segunda (15/06/2020). Imajen/Eugénio Pereira

ERMERA, 16 juñu 2020 (TATOLI) – Lider karizmátiku, Kay Rala Xanana Gusmão,  segunda ne’e, hala’o inaugurasaun ba Sentru Turizmu komunitáriu ne’ebé harii besik estrada ibun Mota Baindeira, Aldeia Rai-Mutia, Suku Baboe-Kraik, Postu Administrativu Atsabe, Munisípiu Ermera.

Xanana apresia tebes inisiativa no  esforsu Grupu Juventude Kriativu Atsabe ne’ebé harii fatin sentru turizmu komunitária ho baze tradisionál atu bele atrai  turista lokál no internasionál sira bele vizita ba Atsabe.

Atsabe koñesidu tebes ho poténsia turizmu natureza Mota Baindeira, Bee Mutin inklui fatuk ko’ak no rai ne’ebé riku kafé ho variedade poténsia ortikultura.

Eis Primeiru-Ministru Xanana Gusmão, esklarese  iha Planu Estratéjiku Dezenvolvimentu Nasionál (PEDN) 2011-2030 kria tiha ona planu barak, inklui dezenvolve setór turizmu komunitária iha kada munisípiu atu bele hamoris setór ekonomia no esplora poténsia grupu juventude sira nian  atu jere poténsia iha suku laran to’o aldeia laran.

“Ha’u apresia ho imi nia inisiativa ne’e di’ak tebes, tanba iha PEDN kria tiha ona programa barak, inklui dezenvolve turizmu iha fatin importante sira hanesan imi hala’o ona,” hateten Xanana iha nia lia-menon bainhira inaugura sentru turizmu komunitária ne’e.

Xanana apresia ho inisiativa juventude tau sira nia rekursu hodi dezenvolve setór turizmu iha área oin-oin bele fó kontribuisaun ba dezenvolvimentu turizmu iha Atsabe.

Xanana sujere ba oin joven sira ne’e harii mós fatin turizmu simples besik kedas foho Mota Baindeira nia hun ne’ebé iha beleza furak atu atrai turista sira.

“Ha’u nia oan sira mai vizita ona fatin ne’e furak tebes, ha’u sujere imi harii atu harii mós sentru besik kedas Mota Bandeira nia hun, tanba fatin ne’e iha beleza furak ho nia bee ne’ebé furak bele atrai turista sira,” hateten Xanana.

Nia hatutan, iha PEDN dezenvolve turizmu ho nia programa prioridade hanesan, promove kriatividade joven sira nian, kapasita joven sira oinsá aplika sira nia koñesimentu ne’ebé dezenvolve komunidade nia moris liuhusi turizmu no tulun komunidade promove sira-nia produtu oin-oin.

Iha parte seluk, Xefe Juventude Baboe-Kraik, Florentino de Deus, husu ba Xanana atu apoia ekipamentu desportu futeból nian hanesan, farda joga bola, bola volley, sapatu inklui ekipamentu banda múzika nian.

“Ami agradese ho prezensa maun boot Xanana hodi mai inaugura sentru turizmu ne’e besik malu kedas ho Mota Bandeira nia furak,” nia hatete.

Iha fatin hanesan, Xefe Suku Baboe-Kraik, Luis Fernandes deklara,  Grupu Juventude Baboe-Krai harii objetu turizmu tradisionál ne’e iha loron 23 maiu no remata 23 juñu 2020 iha área Aiblau hodi motiva joven sira dezenvolve sira nia talentu, no ba joven sira ne’ebé vizita ba fatin ne’e hasai fotografia ruma sei selu taxa $1 ba grupu juventude sira.

Fatin ne’e nu’udar sentru turizmu komunitáriu no sai hanesan kontribuisaun juventude hodi prienxe dezenvolvimentu iha suku ne’e.

Nia hatutan, sentru ne’e sai hanesan meius no ponte ida atu hametin amizade, halo unidade entre juventude Baboe-Kraik hodi sai joven ne’ebé iha inisiativa, kriativu no inovativu.

Joven sira husi ba Lider Karizmátiku, Xanana atu kontinua suporta fundus inklui material konstrusaun hanesan besi, inklui tinta hodi ajuda joven sira hadi’a fatin ne’e sai di’ak liután.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here