Diretór WFP iha Timor-Leste, Dageng Liu akompaña voo servisu aéreu umanitáriu dahuluk iha Aeroportu Comoro, tersa (16/06). Imajen/UN Timor-Leste

DILI, 16 juñu 2020 (TATOLI) – Programa Ai-han Mundiál husi Nasaun Unida (WFP, sigla inglés) oferese ajuda liuhosi servisu aéreu umanitáriu semanál ne’ebé liga Timor-Leste ba sentru lojístiku WFP nian iha Kuala Lumpur, Malázia.

Voo semanál ho Malaysia Airlines ne’e lansa dahuluk iha loron 14 juñu, hodi lori sasán umanitáriu no médiku ne’ebé importante ba Timor-Leste inklui fasilita mós movimentu traballadór umanitáriu ne’ebé apoia Governu no komunidade sira-nia intervensaun hasoru COVID-19.

Aviaun charter husi WFP iha Timor-Leste ne’e to’o iha Aeroportu Internasionál Prezidente Nicolau Lobato, Comoro iha tuku 10:00 dader.

Diretór WFP iha Timor-Leste, Dageng Liu, hateten kada voo sei tuir protokolu saúde públiku  ho rigorozu hodi prevene ponténsia transmisaun surtu COVID-19.

“Asegura movimentu umanitáriu no sasán, esensiál tebes ba susesu kombate hasoru pandemia globál ne’e iha Timor-Leste no iha mundu tomak,” refere Dirijente ne’e hanesan haktuir iha nota imprensa ne’ebé Agência Tatoli asesu, tersa ne’e.

Hahú husi loron ikus janeiru, WFP, Organizasaun Mundiál ba Saúde (OMS) no komunidade internasionál hahú haruka ona sasán umanitáriu inklui médiku ba nasaun 121 husi sentru lojístiku globál no rejionál, inklui Kuala Lumpur no Guangzhou, Xina, ne’ebé lokaliza iha Ázia.

Iha Ázia no Pasífiku, voo ne’ebé aluga husi WFP fó ona apoiu ba intervensaun hasoru COVID-19 iha Afghanistaun, Bangladesh, Laos, Myanmar, no Nepál, maibé iha fatin balun servisu hmanitáriu neme hetan suspensaun ona desde marsu tanba pandemia.

Antes ne’e, Dageng Liu hasoru malu ho Ministru ba Prezidénsia Konsellu Ministru no Ministru Koordenadór no Asuntu Ekonómiku, Fidelis Manuel Leite Magalhães hodi diskute kona-ba apoiu sosiu-ekonómiku Governu ba nesesidade apoiu produsaun lokál no obstákulu nutrisaun ezistente iha Timor-Leste.

Tanba ne’e WFP prontu apoia prioridade Governu nian, liuliu ba nutrisaun no kadeia abastesimentu ba Ministériu Saúde, Sentru Lojístiku Nasionál no Ministériu Solidariedade Sosiál no Inkluzaun.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here