Vise Ministru Edukasaun Juventude no Desportu, João Zacarias. Imajen/ Egas Cristovão

DILI, 16 juñu 2020 (TATOLI)-Vise Ministru Edukasaun Juventude no Desportu, João Zacarias Freitas Soares, tersa ne’e hasoru malu ho Primeiru-Ministru, Taur Matan Ruak, ba dala ikus  antes sai husi ninia kargu nu’udar membru Governu Konstitusionál daualu.

Membru Governu husi Partidu Kmanek Haburas Unidade Timoroan (KHUNTO) ne’e dehan nia sei husik kargu ne’e tanba submete ba desizaun Partidu nian ne’ebé deside ona sei troka ema seluk.

“Ha’u hasoru ona Primeiru-Ministru hodi rona no informa ha’u nia pozisaun ba oin. Ha’u hatene sei la kontinua tan servisu ida, nu’udar membru Governu no mós sidadaun hakruk ba desijaun hotu,”dehan Governante ba jornalista iha Palacio do Governo Dili, ohin.

Kona-ba rajaun Partidu KHUNTO ezonera nia husi kargu Vise Ministra Edukasaun Juventude no Desportu, nia lakohi komenta ba públiku tanba konsidera segredu, maibé nia promete sei fó sai ba mídia hafoin entrega kargu ne’e ba Vise Ministru foun.

“Ha’u kumpre desizaun kuandu dehan para obrigadu barak, tanba ha’u asume pasta nu’udar Vise Ministru la’ós mai tuur de’it, ha’u prontu kontribui ba rai ida ne’e atu dudu dezenvolvimentu nasaun nian,” nia esplika tan.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here