Sekretáriu Estadu Formasaun Profisionál no Empregu, Julião da Silva. Imajen Tatoli/Egas Cristovão

DILI 16 juñu 2020 (TATOLI)Sekretáriu Estadu Formasaun Profisionál no Empregu, Julião da Silva, informa traballadór timor-oan iha Austrália no Koreia Súl na’in-90 seidauk iha serteza bele fila mai Timor-Leste tanba Aeroportu iha nasaun ne’ebé sei halo tránzitu hanesan Indonézia no  Singapura sei taka.

“Karta haruka ona ba Indonézia no Singapura iha loron 11 maiu maibé to’o oras ne’e seidauk hetan resposta husi autoridade nasaun rua ne’e. Tanba ne’e traballadór sira seidauk bele mai iha fulan ne’e ka fulan oin, depende ba ema loke ona maka sira bele mai,” dehan Sekretáriu Estadu Julião da Silva iha salaun Fórum Organizasaun Naun Govermentál Timor-Leste (FONGTIL), Caicoli, tersa ne’e.

Tuir governante ne’e, laiha solusaun no alternativa seluk ba traballadór timor-oan iha  Korea Súl tanba dalan di’ak maka liu Singapura, Indonézia no mai Timor-Leste duke liu nasaun seluk bele lori risku Coronavírus mai Timor-Leste.

“Traballadór sira iha Koreia Súl la problema, hein banhira aeroportu iha Indonézia no Singapura loke ona hodi bele halo tránzitu, tanba labele haruka direita husi ne’ebá mak mai,” nia akresenta.

Enkuantu Traballadór timor-oan sira iha Austrália daudaun ne’e kontratu ramata ona, tanba ne’e SEFOPE sei buka meiu.

“Sira oras ne’e hein de’it, sei aeroportu loke ona no Organizasaun Mundiál Saúde deklara ona zero COVID-19 maka bele haruka sira mai, maibé husi parte SEFOPE sei esforsu hela atu ko’alia ho ajénsia empregadór iha Austrália hodi bele fó servisu ba traballadór ne’ebé ninia kontratu ramata ona,” tenik governante ne’e.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here