Komunidade sira iha Sede Suku Fatuhada bainhira forma hodi simu ona subsidu $200 ne'ebe Governu fo tanba implementasaun Estadu Emerjensi durante fulan rua relasiona ho Coronavirus, Imajen/Antonio Goncalves

DILI, 16 juñu 2020 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten pagamentu iha oras servisu ne’ebé hahú dadeer tuku 08:00-12:00 no kontinua fali lorokraik tuku 13:00-17:30 maibé suku rua iha Munisípiu Dili halao pagamentu ba subdsídiu $200 to’o tuku 21:30 kalan. 

Notísia Relevante: Ekipa Pagamentu MSSI Rejistu Reklamasaun Hamutuk 6.580

Nia hatutan, tuir loloos labele tanba atu garante seguransa ba osan no seguransa ba ekipa pagamentu entaun tenke ramata tuir oras servisu nian, tanba xefe suku no ekipa pagamentu mós lakohi tau an ba risku.

“Horikalan, ha’u rona informasaun katak iha Suku Manleuana no Fatuhada kontinua halo pagamentu to’o tuku 21:30. Ne’e tuir loloos labele tanba atu garante seguransa ba osan no ekipa pagamentu, entaun pagamentu tuir oras ne’ebé mak MSSI fó sai katak temina iha tuku 17:30 lorokraik,” dehan Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, ba jornalista sira iha salaun MSSI, Caicoli, Dili, tersa ne’e.

Ho akonetsimentu ida-ne’e, nia parte halo kontaktu direta ho komandante Polísia Munisípiu atu tau atensaun ba suku hirak ne’ebé kontinua halo pagamentu iha oras kalan nian, hodi nune’e bele asegura seguransa iha fatin pagamentu sira ne’e. 

“Presiza garante seguransa iha fatin pagamentu tanba osan ne’e fó risku ba ita. Ita hakarak seguru atu nune’e pagamentu subsídiu ne’e bele finaliza tuir ita-nia kalendáriu,” nia dehan. 

Tanbam nia hateten, bainhira programa pagamentu subsídiu $200 bele finaliza ho susesu presiza komunidade hotu nia kontribuisaun atu hala’o pagamentu tuir regra ne’ebé mak iha.

Nia informa, prosesu pagamentu iha Munisípiu 11 seluk ne’e ladún iha problema no pagamentu kuaze atu finaliza ona, maibé problema barak mak akontese iha Dili. 

“Ha’u lahatene tanba saida karik. Ha’u hanoin ita-nia autoridade iha Dili lakohi halo kooperasaun ho másimu. Haa’u lahatene ho sira-nia intensaun saida. Dala ida tan, ha’u hakarak hateten,  programa pagamentu ne’e programa Governu nian. Nune’e hakarak lakohi ita tenke implementa,” nia esplika.

Kona-ba falsifikasaun dokumentu, nia dehan, ninia knaar mak halo pagamentu ba benefisiáriu sira. Loloos, tuir nia, hosi Komisaun Anti Korrupsaun (CAC, sigla Portugés) ho Provedória Direitu Umanu no Justisa (PDHJ, sigla potugés), presiza halo investigasaun mais profunda hodi nune’e sei bele loke prosesu. 

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here