Rebentamentu fatuk ne'ebé halo husi empreza China Harbour iha Kaitehu, Suku Mota Ulun. Foto/António Gonçalves.

DILI, 16 juñu 2020 (TATOLI) Sekretáriu Estadu Ambiente, Demétrio do Amaral de Carvalho, konsidera empreza China Harbour ne’ebé implementa projetu nasionál Portu Tibar hatene jere risku ambientál hodi la viola lisensa ambientál ne’ebé atribui ona.

Lisensa ne’ebé fó ba empreza atu halo esplozivu ba pedreira iha rai ho ektare 4,2, iha área Kaitehu, Aldeia Mota Ikun, Suku Mota Ulun, Postu Administrativu Bazartete, Munisípiu Liquiça, atu bele aterra iha Portu Tibar.

“Atividade bo’ot hanesan ne’e sempre iha implikasaun ba ambiente, maibé ita haree no monitoriza risku mínimu tebes tanba sira iha kapasidade jestaun di’ak. Maibé bainhira dulas fatuk tenke iha regra ba rai rahun sira inklui kria zetty ida iha Ulmera hodi labele estraga ahu-ruin sira,” tenik Sekretáriu Estadu Demétrio ba Agência Tatoli, iha ninia kna’ar fatin, tersa ne’e.

Notísia Relevante: China Harbour Halo Tan Rebentamentu Fatuk Iha Kaitehu

Tuir nia, China Harbour empreza importante ida ne’ebé halo servisu ba projetu estratéjiku estadu nian ne’ebé Governu Timor-Leste ho Bolloré selebra ona akordu no hosi empreza xineza ne’e hamutuk ho empreza seluk bele implementa projetu Portu Tibar.

“Ita fó lisensa ambientál ba empreza China Harbour iha kedas inísiu ho kategoria A, hafoin ita halo prosesu avaliasaun ho rigór tebes no ita halo avaliasaun no monitorizasaun permanente iha kampu ne’ebé sira-nia servisu iha satisfasaun boot tebes ba Timor-Leste,” nia akresenta.

Maski, nia dehan empreza xineza ne’e estraga ai-parapa, ahu-ruin no du’ut tasi balun iha fatin naturál ne’ebé koverte ona ba portu, maibé iha Sekretaria Estadu Ambiente (SEA) eziste konseitu ida atu troka fali fatin empreza ne’e hosi kuda fali ai-parapa.

“Ita nia mekanizmu troka ne’e obrigatoriamente ektare haat no volutariamente sira tenke halo liu ektare 15 ba konservasaun ai-parapa no zona ahu-ruin inklui du’ut ne’ebé sira estraga ona. Ita deside ona fatin balun iha área Ulmera, Liquiçá nian no balun ita sei deside atu empreza xineza ne’e kuda ka konserva fali hodi troka estragu ne’ebé halo ona,” Sekretáriu Estadu ne’e subliña.

Ho nune’e, governante ne’e haktuir, iha selebrasaun loron mundiál ambiente iha loron 5 juñu, Governu liuhosi SEA atribui sertifikadu apresiasaun ba empreza China Harbour.

Antes ne’e, Diretór Kompañia China Harbour Timor, Lda, Wang Wei, informa atividade konstrusaun Portu Tibar ne’ebé antes ne’e konsege suspende maibé daudaun ne’e la’o filafali no to’o fulan-maiu progresu fíziku konstrusaun atinje ona porsentu 30.

Progresu fíziku inklui kompleta reklamasaun no kee fatuk ba Portu Tibar, harii pedreira, batching plant, precast yard, Jetty temporáriu, steel piling, no produsaun estrutura fatuk la’o daudaun, maibé kona-ba taxa sei konsolida ho rai ne’ebé mak reklama.

Konstrusaun Portu Baía Tibar ho modalidade Parseria Públika Privada (PPP) husi konsórsiu Governu Timor- Leste ne’ebé aloka hamutuk millaun $130 no Timor Port inklui Bolloré hamutuk millaun $140, ho totál millaun $270 ba faze inísiu. Totál investimentu orsamentu ba Portu Tibar to’o tinan 30 ho valór millaun $500.

Timor-Leste sei iha portu ho performa ne’ebé a’as ho nia distánsia kilómetru 12 husi kapitál Dili no Portu Tibar sei sai hanesan portu ida ne’ebé boot liu iha Timor-Leste no sei aumenta kapasidade infraestrutura ba volume importasaun no esportasaun.

Portu Baía Tibar sei sai sentru transborda rejionál ida, ne’ebé lokaliza iha área dinámika iha mundu no serve ba movimentasaun entre Xina, Hong Kong no Singapura ba dirasaun Papua, Indonézia no Norte Austrália hanesan Portu Deepwater dahuluk iha rejiaun ne’e.

Portu ne’e harii iha rai ektare 27 no sei iha doka ho métru 630 no konstrusaun ne’e sei hala’o durante tinan tolu, hahú loron 30 agostu 2018 no tuir planu sei ramata iha 30 agostu 2021.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here