Tribunál Distritál Dili. Imajen/TATOLI

DILI, 16 juñu 2020 (TATOLI) – Tribunál Distritál Dili (TDD) liuhusi audiénsia julgamentu, ohin, aplika medida koasaun aprezentasaun periódika (AP) ba arguidu ho inisiál MF ne’ebé envolve sona kanek vítima J iha konfrontasaun entre juventude iha Suku Bebonuk, Postu Administrativu Don Aleixo, Munisípiu Dili, foin lalais ne’e.

Audiénsia primeira interrogatóriu ne’e, Juis singular Ana Paula, foti medida koasaun aprezentasaun periódika ba arguidu MF tanba faktu ne’ebé aprezenta no prodús  hosi Prokuradora Ivonia Guterres, la forte.

Faktu ne’ebé arrola husi Ministériu Públiku (MP) reprezenta husi Prokuradora Ivonia Guterres,  katak iha loron 01 juñu,  tinan ne’e, iha tempu kalan, iha area Bebonuk nian, arguidu bainhira ba hola ikan hafoin fila husi dalan iha ema balun ne’ebé tenta halo asaltu hodi fatuk tuda arguidu, maibé laiha kauza ruma ba arguidu rasik, maibé arguidu halo defeza ba nia an lori tudik sona vítima J.

Kazu ne’e deskonfia envolve arguidu MF no suspeitu JA, maibé oras ne’e parte polísia buka tuir hela JA tanba seidauk hetan no seidauk halo kapturasaun.

Ho aktu ne’e MP promove arguidu ho krime rua, hanesan arma branka iha lei númeru 5/2017, pratika arte-marsiál sira nian no rituál, arma branka ne’ebé define iha artigu númeru 1,2 ko’alia kona-ba katana, espada no seluk tan, rama ambon kompletamente kriminál liu bele hetan ho pena durante tinan-haat (4) to’o tinan-ualu (8).

MP mós promove arguidu ho krime ofensa integridade fízika simples ne’ebé previstu iha artigu 145 kódigu penal Timor-Leste, ne’ebé hateten se mak ofende ema seluk nia isin ka saúde sei hetan pena prizaun to’o tinan-tolu (3) ka multa.

Defeza Henrique Maris, ne’ebé fó asisténsia legal ba arguidu MF, konsidera desizaun Tribunál nian aplika medida koasaun aprezentasaun periódiku ba nia kliente ne’e fundamentu, atu nune’e, bele fasilita prosesu investigasaun husi parte MP nu’udar hanesan nain ba asaun penal.

“Hanesan deklarasaun arguidu nian no faktu ne’ebé aprezenta husi MP, maibé hanesan iha momentu ne’ebá ema halo asaltu arguidu iha dalan no la halo kauza ruma ba ema ne’ebé halo asaltu, maibé iha loron tuir mai vítima ne’ebé kanek nia maluk lori motor iha dalan hetan arguidu hateten arguidu mak sona,” esplika  Defensór Públiku Henrique Maris.

Tuir prosesu bainhira desizaun primeiru interrogatóriu nian la aseita husi MP bele halo rekursu iha loron 15 nia laran, sura husi loron desizaun.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here