Diretór Jerál Prezidénsia Repúblika, Domingos do Amaral , entrega sasán nesesidade bázika ba komunidade kbiit laek sira iha Suku Ailok, Postu Admiministrativu Cristo Rei, Munisípiu Dili. Imajen/Mídia PR.

DILI, 16 juñu 2020 (TATOLI)–Prezidente Repúblika hamutuk ho Gabinete Apoiu Atividade Konjúje Prezidente Repúblika fó apoiu nesesidade bázika ba uma-kain 30 iha Aldeia Lenuk-Hun, Suku Camea no família 40 iha Suku Ailok, Postu Administrativu Cristo Rei no uma-kain 50 iha Suku Santa Cruz, Postu Administrativu Nain Feto, Munisípiu Dili.

Notísia Relevante: GAAC-PR Fó Apoiu Nesesidade Bázika ba Família Uma-Kain 500 iha Ataúro

Diretór Jerál Prezidénsia Repúblika, Domingos do Amaral hateten, hafoin Prezidente Repúblika Francisco Guterres “Lú Olo” no Espoza simu pedidu hosi autoridade no entidade sira kona-ba sofrimentu ne’ebé uma-kain hirak enfrenta, nu’udár aman ba nasaun no Prezidente ba Povu tomak, foti desizaun hodi fó apoia ba família 120 ne’e, nune’e bele hakma’an sira-nia sofrimentu iha tempu surtu COVID-19.

“Ha’u lori Prezidente Repúblika nia naran oferese nesesidade bázika hirak ne’e, hodi hakma’an terus durante tempu COVID-19,” Diretór Jerál Prezidénsia Repúblika, Domingos do Amaral, ba komunidade sira iha Sede Suku Ailok, Postu Administrativu Cristo Rei, Dili, tersa ne’e

Iha fatin hanesan, Xefe Suku Ailok, Postu Administrativu Cristo Rei, Mario do Rego, espresa ninia sentimentu haksolok no agradese ba apoiu hosi Prezidente Repúblika, atu bele sustenta moris durante Estadu Emerjénsia.

“Ha’u lori komunidade nia naran hato’o abrigadu ba Prezidente Repúblika, tanba bele apoiu ona sasan hirak ne’e. Durante situasaun Estadu Emerjénsia, ha’u-nia komunidade labele sai ba buka moris,” Xefe Suku Ailok hateten.

Nune’e mós, Xefe Aldeia Lenuk-Hun, Jacinto Soares, iha esperansa katak ho apoiu ne’ebé nini iha, ninia komunidade bele sustenta aan to’o Estadu Emrejénsia datoluk ramata.

Hosi uma-kain 120 ne’e, ohin, oferese ona sasán nesesidade bázika ba uma-kain 70, kompostu hosi uma-kain 30 iha Aldeia Lenuk-Hun, Suku Camea, família 40 iha Suku Ailok, Postu Administrativu Cristo Rei.

Tuir ajenda, aban (kuarta, 17/06/2020), Diretór Jerál ho ekipa sei oferse tan sasán nesesidade bázika ba uma-kain 50 iha Santa Cruz, Postu Administrativu Nain Feto.

Sasán nesesidade bázika ne’ebé oferese ba komunidade kbiit laek sira mak anesan fós karon 120, supermie kaixa 120, mina Bimoli 120, rinso Daya, sabaun haris no seluk tan, bazeia ba  totál uma-kain ne’ebé iha.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here