Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos. Imajen Tatoli/Egas Cristovão

DILI, 16 juñu 2020 (TATOLI) – Vise Primeiru-Ministru (VPM) no Ministra Solidariedade Sosiál no Inkluzaun, Armanda Berta dos Santos, relata progresu servisu ba Primeiru-Ministru (PM), Taur Matan Ruak, relasiona ho pagamentu subsídiu ba uma-kain ne’ebé mak hala’o ona iha munisípiu 12.

“Ha’u mai reuniaun ho Primeiru-Ministru hanesan reuniaun semanál hodi relata progresu servisu durante ne’e. Tanba agora ita sei hela iha situasaun prevensaun COVID-19 maka servisu ne’ebé ha’u relata mak kona-ba pagamentu $100 kada uma-kain sira ne’ebé realiza ona,” dehan governante ne’e hafoin hasoru malu ho PM Taur iha Palásiu Governu, tersa ne’e.

Tuir ministra pagamentu tarde tanba presiza halo preparasaun di’ak mak bele realiza, maski nune’e pagamentu ba munisípiu 12 kuaze konklui maibé falta kompleta dadus Rejiaun Administrativa Espesiál Oé-cusse Ambeno (RAEOA).

“Loos ha’u rekoñese katak pagamentu atraza duni, maibé importante maka $100 ne’e bele to’o ba populasaun sira”, dehan Berta.

Nia haktuir, iha enkontru ne’e bainhira atualiza progresu pagamentu, Xefe Governu presta sentimentu kontente no hato’o parabéns ba ekipa tékniku sira ne’ebé halo pagamentu iha terrenu.

Dadaun ne’e, Ministériu Solidaridade no Inkluzaun (MSSI) kuaze konklui ona pagamentu ba uma-kain iha munisípiu 12 hamutuk 298.119 ho totál orsamentu hamutuk $59.623.800 ba pagamentu $200 kada uma-kain, la inklui RAEOA

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here