Membru PN hosi Bankada FRETILIN, Antoninho Bianco.

DILI, 16 juñu 2020 (TATOLI)—Konstituisaun Repúblika Demokrátika Timor-Leste (K-RDTL) no Rejimentu Parlamentu Nasionál (RPN) fó dalan atu VIII Governu Konstitusionál bele aprezenta Orsamentu Jerál Estadu (OJE) 2020 no 2021.

Notísia Relevante: Iha Setembru-Outubru, Governu Sei Ko’alia Kle’an OJE 2020-2021

Prezidente Komisaun D (Ekonomia no Dezenvolvimentu), Deputadu Antoninho Bianco, rekoñese orsamentu ne’ebé la pasa iha Parlamentu Nasionál labele hatama duni iha tinan ne’e (tinan lejizlativa).

Nune’e mós, nia dehan, Rejimentu Parlamentu Nasionál artigu 45 hatete lejizlativa ne’e hahú 15 setembru (tinan la’o daudaun) ba to’o 14 setembru tinan ida oin-mai, lei Orsamentu Jerál Estadu ida la pasa ne’e iha segunda lejizlativa, momentu ne’e 15 setembru 2019 entaun hotu iha 14 setembru 2020.

“Entaun 15 setembru 2020 ne’e terseira lejizlativa no terseira lejizlativa ne’e bele ona hatama. Ne’e konjuga ne’e konstituisaun RDTL artigu 97 alínea 3 konjuga ho Rejimentu Parlamentu Nasionál artigu 45, tanba ne’e lei Orsamentu Jerál Estadu bele mai ona. Agora, fásil liu tanba hetan apoia iha ne’e (Parlamentu Nasionál) no konstituisaun fó dalan, la blokeia no rejimentu mós fó dalan,” dehan Deputadu Antoninho Bianco ba jornalista sira iha Parlamentu Nasionál, tersa ne’e.

Deputadu hosi Bankada FRETILIN ne’e hateten, ema balun interpreta labele aprezenta ona ne’e lae, tanba VIII Governu ne’e Konstitusionál.

“Independentimente balun (partidu balun) sees tiha maibé Governu ne’e povu nian entaun parlamentu viabiliza hodi hala’o serbisu nafatin. Tanba ne’e, Governu iha kompeténsia plenu (pleno) atu lori orsamentu mai. Tanba ne’e, Governu sei hatama fali proposta lei orsamentu iha 15 setembru 2020 no tuituir malu fali 15 outubru 2020 lori fali orsamentu 2021 nian,” nia dehan. 

Prezidente Komisaun D ne’e esplika, orsamentu 2020 ne’e barak mak uza tiha ona hahú hosi janeiru to’o setembru.

“Signifika outubru, novembru no dezembru la presiza planu barak liu fulan tolu ne’e,” Deputadu Antoninho Bianco hateten. 

Notísia Relevante: Ohin, KM Halo Kalendarizasaun ba Aprezentasaun OJE 2020-2021

Tuir Konstituisaun Repúblika Demokrátika Timor-Leste (K-RDTL) artigu 97 (Inisiativa lei nian):

1. Karan hahú lei nian pertense ba:
a) Deputadu sira;
b) Bankada Parlamentár sira;
c) Governu.
2. Labele aprezenta projetu no proposta lei nian ka alterasaun ne’ebé, iha tinan ekonómiku ne’ebé la’o daudaun, foti sa’e despeza no hatún reseita Estadu nian ne’ebé mai iha Orsamentu ka iha Orsamentu Ratifikativu sira.
3. Projetu no Proposta lei ne’ebé sesaun lejizlativu ida la simu, sei bele sisi nafatin iha sesaun ne’e nia laran.
4. Projetu no Proposta lei sira, ne’ebé la vota ba, bele halo fali iha sesaun lejizlativu ida tuirmai, la’e de’it wainhira termu lejislatura mak la hatán.
5. Proposta lei nian remata ho Governu nia demisaun.

Nune’e mós, Rejimentu Parlamentu Nasionál artigu 45 (Sesaun Lejizlativa):
1. Sesaun lejizlativa dura tinan ida, hahú iha 15 setembru no remata iha 14 setembru iha tinan tuir mai.
2. Períudu normál funsionamentu Parlamentu Nasionál nian hahú iha 15 setembro no remata iha 15 jullu, sein prejuízu ba períodu suspensaun iha Natál entre 23 dezembru no 2 janeiru tinan tuir mai, no suspensaun seluk-seluk ne’ebé Parlamentu delibera liuhosi maioria dois terços 29 hosi Deputadu eleitu sira.

Entretantu, Lei Orsamentu no Jestaun Finanseira (LOGF-sigla portugés) Nú.13/2009 artigu 30 (Prazu Aprezentasaun) alínea 1, hateten Governu aprezenta orsamentu até 15 outubru.

Notísia Relevante: Hakarak Lori Fila OJE 2020-2021, Taur Dezeja PN Funsiona Lalais

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here